ZALEN July 1, 2025 : Vawiin khan MSU General Headquarters hruaitute chuan H&TE Directorate Office kawtah Unqualified Part Time Asst. Professors mi sawmhnih leh pakua (29) te sawrkar in a chhawr chhunzawm zelna tur Notification Order a tihchhuah chu duhlohna lantir nan an hal. 

Part Time Asst. Professors sawrkarin a rawih mekte hi Nikum August ni 9, 2024 khan February ni 28, 2025 thleng chhawr chhunzawmna lehkha lo tichhuak tawhin chuta a inziah danah chuan, “No more Extension of engagement will be done after 28.02.2025” a intih tawh hnuah February ni 21, 2025 khan hun pek belhna Notification a tichhuak leh hi MSU General Headquarters chuan pawi an ti hle a ni. Notification thar tihchhuah leh hi an duhloh zia entirnan Higher & Technical Directorate kawtah Notification ( February 21, 2025a tihchuah) hi an hal a ni. 

Notification Order Halna programme-ah hian MSU President B. Lalkhawngaihzuala chuan thusawiin, Zirna tha siam tumin Zirtirtu Qualify lo te sawrkar in an ruai reng chu hriatthiam har a tih thu a sawi a. Zirtirtu Qualify lo ten zirna an pek theihna tur atana sawrkarin “Humanitarian Ground” tia a chhawr hi “Humanitarian Ground chhuanlama langsar taka Dan bawhchhiatna a ni” a ti. March 13, 2025 khan Press Conference hmang mai bakah Vawi tamtak Education Minister hnenah he thu hi an thlen tawh bawk a, tin June ni 9 khan Chief Minister hnenah an lo thlen tawh bawk a ni. Nimahsela an thu thlenin awmzia a neihloh avang leh ngaih pawimawh a hlawh loh avangin Notification Order hi kan hal ati a ni. 

MSU chuan Director hnenah Notification an hal zawh hian ziakin lehkha an pe nawn leh a. July 6, 2025 (Pathianni) ral hmaa MSU ngenna hi ngaih pawimawh a nih loh chuan zirlai ten zirtirna tha kan dawn theihnan Qualify ngei zirtirtu an duh thu Aizawl khawpuiah kawngzawhin tlangaupuina neih an tum a. Kawngzawh hian awmzia a neih loh pawhin a tawp thlenga hmala zel turin ruahmana an siam a ni.