ZALEN June 26, 2025 : Chief Election Commissioner Gyanesh Kumar leh Election Commissioner pahnih Dr. Sukbhir Singh Sandhu leh Dr. Vivek Joshi te kaihhruai Election Commission of India chuan kum 2019 atanga chhiara a tul anga vawikhat mah election an chuh loh avang leh an office awmna an hmuh zawh loh avangin RUPPs (Registered Unrecognized Political Party) 345-te chu an nihna atanga paih turin an chhinchhiah a, an zingah hian Mara Democratic Front (MDF) leh PRISM an tel.

RUPPs 345-te hi ram chhunga State leh UT hrang hranga mi te an ni a. ECI hnuaia inziak lut RUPPs 2800 chuang zinga thenkhatte chuan RUPP an nih anga an tih tur tul an ti lo tih Commission chuan a hria a. Ram pum huap hmalakna neiin RUPP zinga 345 te hi an chhinchhiah tawh. Felfai lo deuha party te paih an nih loh nan States/UTs tin a CEO-te chu heng RUPPs te hi a chhan zawt tur leh CEO hmaa insawifiahna hun pe turin a hriattir a ni. RUPP paih tura thuthlukna chu Election Commission of India in a siam ang. Chief Electoral Officer, Mizoram office chuan an report hnuhnung berah hian MDF leh PRISM hi an identified/locate thei tawh loh a ni, an ti.

Ram chhunga Political parties-te (National/State/RUPPs) chu Representation of the People Act 1951 Section 29A angin ECI hnuaiah an in ziak lut a. Hemi hnuaiah hian pawl eng pawh political party anga in ziak lut tawhte chuan chhiah awl thlengin harnthatna hrang hrang an nei thei a ni. Mizoram-ah hian RUPP pali chhinchhiah an nia - Mizoram People's Conference (MPC), Hmar People's Convention (HPC), Mara Democratic Front (MDF) leh PRISM te an ni.