Aizawl February 16, 2024 : Congress Bhawan-a ‘Friday Political Session’ neihah Mizoram Pradesh Congress Committee President Lalsawta chuan thu a sawi. Lalsawta chuan hun tharah an lut a, hun hlui chu a liam tawh a, Congress Party pawhin Mizo mipui, a bikin thalaite hip zawnga Party kalphung her danglam a ngai tawh tih a sawi.

Lalsawta chuan, "Sipaiin ram a runna chu i lo do let thei a, mahse, hunin a rawn ken ngaihdan erawh hi chu a do let theihloh a ni. A hun a lo thlen hi chuan a hunlai mamawh mila kan inher danglam a ngai a ni. Congress Party hian Zoram mipui tan hmathlir thui tak kan nei a, chu kawng tha leh ram dinchhuahna chu zawhpui kan tum a ni tih kan hriattir dawn a ni," a ti.

"Pathianin ram min pe, mipui min pe bawk. Pathian lam kan hawi ang a, kan duh hi Pathian duh nen a inmil thlap a nih chuan kan hlawhtling ngei ang. Kan party kal zelna turah kan ram tan a tha em, mipui tana a tha em tih hian min zawt reng dawn a, kan sorkar leh thuai dawn tih hi kan ring tlat a ni," a ti.

Congress kal zelnaah kalsual ngai loh a pawimawh thu sawiin, "Mipuite nena lungrual taka kan kal zel theihna tur chu mahni lam indah tha in kan rawngbawlsakte hi an ziawm em, harsatna eng nge an neih kan chinfel theih ang tih kan ngaihtuah ber chuan he ram hi siamthatin a awm dawn a, chu chu kan party kal dan tur a ni," a ti.

MPCC President chuan, "Party mipui pawhin Politician chuam neiha mahni tanghma hai tum anga min ngaih lohna tur leh ram kan hmangaih tak zet tih an hriatna turin kan nun hian mipui hmaah tarlang rawh se. President ka nih chhunga in mi tawiawmna leh inpeknaah ka lawm em em a. Kan hruaitu tharte chungah pawh inlantir zel ka ngen bawk a ni," a ti bawk.