Aizawl: Village Council , Local Council leh by election chu hrileng vangin hlauhna in voter lam a chiah a. Inthlanna atan hian inbuatsaihna thui tak kalpui ni tawh mah se party leh NGO lam chuan vote a tlak that an ring lem lo.

Mizoram Upa Pawl (MUP) President Lalhuapzauva chuan vote tla a that a rin loh thu a sawi a. “Thenkhatten sawn hlat an rawt hi a awm ka ti a. Chutih rual erawh chuan kan hma lam hun hi a pik tawlh tawlh thei a; chuvangin, kan nih ang ang nih mai pawh hi a tha mai thei a. Kum lama upa tan chuan chhuah a titawm deuh a; chuvangin, ni dang vote tla chu kan phak ka ring lo a ni,” a ti a. Upate chu mi dangte zirtirtu tur an nih avangin vote thlak tura mipuite zirtirtu ni thei se a duh tih a sawi.

Mizoram People’s Forum general secretary Rev. R.Lalnuntluanga chuan tun tum inthlanah vote a tlak that a beiseiawm loh niin Zalen a hrilh a. “MPF chuan mipui a tam thei ang berin vote hi thlak se kan duh hle,” tiin a sawi.

MNF general secretary T.Liansiama chuan “Kan hma lam hun a hriat loh a, tun hi hri vei tlem hun pawh a ni thei a; chuvangin, inthlan mai hi a fuhin ka hria,” a ti a. Mi tam takin vote an thlak hreh dawn avangin a tlak that a rin loh thu a sawi bawk.

MPCC thupuangtu Dr. Lallianchhunga chuan vote a tlak that a ring lo tih sawiin, “Candidate tinte chhung leh khat, thian tha leh laina zual bakah ruling lam worker-in an thlak tha deuhin a rinawm a. Khua leh tui tha an nihna anga tum danga vote thlak thinten tun tum chu vote thlak lamah thahnem an ngai lo vang. SEC lam hian hripui laka mipui him theihna ber turin vote thlak dan him leh rintlak kalpui an tum thu an puangzar si lo va, mipui rilruah chuan vote thlak chu hripui kai haw theihna risk sang tak angin kan ngai tlat a ni,” a ti.

Cancer Society of Mizoram president C.Laltlankima chuan vote thlak chu a ngamawm nia a hriat thu a sawi a. “Mi tam tak chuan vote thlak hi an hreh ngeiin ka ring a; mahse, vote thlak ngam loh thu a awm dawn em ni? ka ti deuh a. A hun lo thleng phawt se kan hawi lam tur chu a hriat dawn a, tun dinhmunah chuan ngaihdan siam thiam a har deuh a ni,” a ti. bawk.

ZPM general secretary Lalmuanpuia Punte pawhin vote a tla chhe dawn nia a rin thu sawiin, “Party ruh zual bak chuan an thlak ka ring meuh lo a, tunlai hri leng avang hian neutral ten vote an thlak ka ring lo a ni,” a ti.

BJP thupuangtu, Johny Lalthanpuia pawhin kum dang ang chuan a tlak that vak a ring lo nia sawiin mipui rilruah VC/LC chu ‘ni mai mai teh se’ tia palzam an tam a rin thu a sawi a ni.

Zunthlum vei nu pakhat chuan an chhungkhat te candidate ah chuan awm lo se vote thlak a tum lo tih a sawi a. "Ka chhungte zingah candidate an awm ve avangin vote hi ka thlak ngei a ngai a, candidate hi ni lo se chuan Covid 19 avang hian chhuah ka hreh khawp mai," tiin Zalen a hrilh.

Party leh mi tha-hnemngai thenkhat ten hrileng ziaawm hnua inthlan neih mai nise tia an rawtna chungchangah pa pakhat chuan inthlan chu sawn hlat zel chi nia a hriat loh thu Zalen a hrilh a. "Tuna Village Council leh Local Council dinglai term hi tum hnih pawhsei a ni tawh a, an tan pawh an hun tawp hnua chelh reng hi a nuam lo a. 'Hrileng ziaawm hun' tih pawh hi kan hmalam hun kan sawi thei lova. Hri hian kian lam aiin zual lam a pan zel niin a lang a, chuvangin mipui himna atana ruahmanna fel tak nen inthlan hi neih thuai nise ka duh a ni," a ti a. Mipui himnan sawrkar thuneitu ten ruahmanna fel tak siam se a duh tih a sawi bawk.