August 22, 2022: ZPM Treasurer C. Laltanpuia chuan, thingtlang lamah khawpui lam aiin ZPM thli a tleh zawk niin a sawi a, kalphung thar mipui sawrkar an din hunah chuan party President leh Chief Minister nihna chelhkawp an nei dawn lo, a ti bawk. 

Vawiina ZPM party office-a chhung inkhawm an hmanna a thusawitu C. Laltanpuia chuan, “Khawpuiah mar takin kan kal zel a, chutih laiin kan harsatna thin thingtlang lamah khawpui aiin ZPM thli a tleh tawh zawk a, chak leh zuala kal turin a nawrin min rawn nawr a ni ber,” a ti.

Tanpuia chuan, “Kalphung thar mipui sawrkar kan din hunah chuan party President leh Chief Minister nihna chelhkawp kan nei dawn lova, hei hi a thatna leh a danglamna tur chu, Party leh sawrkara nih sang ber chelhkawp kan neih thin avangin sawrkar tha dinna turah hei hian harsatna nasa tak a thlen thin a ni. Tunah hi chuan duh ang thalin an tal a, kan intlawnsiak luih luih a, Democracy ramah dictator ang maia an chet theih avangin mipuiin hei hi kan tuar thin a, mipuiah rilru tha lo tak hei hian tuhin, MLA leh Minister thlengin kan intlawnsiak ta hial mai a ni,” a ti. 

ZPM Treasurer chuan, “Kan party chuan a takin kan policy kan kalpui dawn a, inziahthat siakah kan tel ve lo. Kan hruaitu pahnih Pu Duhoma leh Pu Sapdanga chungchangah dik lo takin party dang ten an ngaihdan leh duhdan te sawiin, min beih nan tak an hmang thin a, mahse, heng zawng zawng hi kan tan malsawmnaah changin, ZPM boruak vuak lenna hmanruaah a chang zel a ni. Hetianga an beihna hian inthianthatna leh thawh dunna tha zawk thlenin chawl pawh chawl hman lovin party tan hun pum an hlan a ni,” a ti.