Aizawl January 31, 2023 : Vawiin khan Awithangpa Hall, Kawnpuiah ZPM Tuirial East & West Joint Block Conference neih a ni a; He huna thusawitu ZPM leader Lalduhoma chuan party sawrkar paihthlain mipui sawrkar an din dawn niin a sawi, party thenkhat chuan an party thatpui tur loh chu an ti duh lo niin a sawi bawk.

Lalduhoma chuan, “Kan policy kalphung thar mipui sawrkarin a ken tel chu danglamna a ni. Sawrkar kan hrawn tawh te lakah kan danglam tur a ni. Kan unit te, kan group te leh kan block te thlengin kan danglam tur a ni. Keini chuan a system tihdanglam kan zuar a, Pathian zara kan lo sawrkar a nih pawhin kan danglam loh chuan awmzia a awm dawn lo. System thar hmang turin mi thar a ngai; budget pharh thang leh a pawh pen dan thiam tawh ten he kalphung hi an khawih thei lo; kalphung thar khawih turin party thar, mi thar kan mamawh a ni. Kalphung thar tih awmzia kan sawi ziah chu mipui sawrkar a ni. Kan sawi chhan pawh kan hrawn tawh sawrkar te hi party sawrkar a ni a, an sawrkar pawhin ram tan ni lovin party tan a ni a, thil tha pawh ti dawn se an party-in a thatpui dawn loh chuan an ti duh lo a ni. Keini ZPM te chuan he party sawrkar hi paihthlain mipui sawrkar kan din dawn a ni,” a ti a.

ZPM Leader chuan, “Sem policy hian kan ram a ti chhe em em a, kan rilru sukthlek thlengin ngawng tha lo tak a nei ta a, a nei zel dawn bawk ni te pawhin a lang. Chuvangin, Kan ram politics-ah hian lungphum thar phûm turin kan insawm a ni. ZPM hian party-a rinawm kan inzirtir lo a, policy-a rinawm tur erawh chuan kan inzirtir thin. Pathian leh mipui hmaa kan thutiama kan rinawm lo a nih chuan min chhuahsan leh ngam turin kan inngen a, tupawh lo sawrkar se thlan leh tlak a nih chuan thlang leh mai ila, thlan leh tlak an nih loh chuan kan thlak leh mai tur a ni,” a ti. 

Ram tichhetu chu rorel lai party zel an ni tiin, Lalduhoma chuan, “Kan ram tichhetu te chu ruling party an ni zel; an sawrkar chhungin tha taka hnathawk chu awm ve bawk mah se, a tam zawkin hna an thawh that loh avangin kan ramin a tuar ta a ni. Keini ZPM-te chu kan ram tichhetu kan ni ve thiang lo; chuvangin, kan pawimawh satliah mai a ni lo a, kan ram leh hnam dinchhuah lehna tur atan pawl ropui tak kan ni,” a ti. 

Politics chu khelh dik tur a ni tiin, “Politics hi khel fuh ni lovin khel dik turin kan inzirtir thin a, mi tha te tel ve theihna turin politics hi kan siam tur a ni. Party ruihchilhna hi thalai teah a awm tawh lo a, kum upa lamah hian hetiang mi hi kan la awm deuh zawk a; thalai zawkte hian thil hi an buk a, thil tha leh tha lo an hre tawh em em a ni. Neutral mipui kan tam tawh em em a, hei hian kan ram politics-ah a tha zawngin nghawng a neih ngei kan beisei,” a ti bawk.