September 19, 2023; Inthlan kumin a ken tel chu 'inlawmluh' a ni. Chu inlawmluh chu political party te tan chuan BREAKING NEWS a ni...!?

Political party tin ten mithar an lawmluh te chu mi pahnih/thum emaw chauh pawh nise, an thlalak nen social media ah an vawrh darh a, hemi kawngah hian in sawi bang thei party an awm lo.

Mithar lawmluh hi a bikin party lian INC, MNF, ZPM ten an nei deuh reng tih an tarlang thin a, hetihlai hian ZPM anga mumal leh felfai zawk a mithar an neih dan mipui a tarlang erawh party dang an awm lo niin a lang.

ZPM tarlan danin, September ni 11- 17 2023 chhung khan mithar 1,060 an nei a. Mizoram Assembly bial hrang hranga tunhnai kar khat chhunga mithar an neih dan an tarlan danin, Lunglei East bial ah mithar 167 neiin, mithar an ngahna ber a ni.

Champhai South ah mithar 140 an nei tih tarlang bawkin, RD minister Lalruatkima bial Aizawl West II ah mithar 136 leh Thorang ah 115 an nei tih an tarlang a. Bial danga mithar an neih an tarlan te chu za hnuailam vek a ni.

Hetihlai hian party dangte pawhin mithar lawmluh hi an nei reng tih an thuchhuah leh social media lama an tarlanna atangin a hriat theih bawk.

Inthlan a hnai zel a, mithar lawmluh hi tun hma atanga inthlan in a ken tel a ni. In awih loh sak ngawt chi a ni lo a, chutih rual chuan mipui nawlpui tana 'awihawm chiah loh' te pawh a awm ve thin bawk !!