Aizawl : Mizoram People Forum (MPF) General Headquarters chuan nimin  khan thuchhuah siamin October 30, 2021-a Tuirial Assembly Consti- tuency bye-election lo awm turah an thu dawn te leh social media lama video darh te avangin Election Commission of India (ECI) thlenga zualko an tum a, an hmalakna hmasaber atan Mizoram election thuneitu te hnenah ziakin an thlen dawn. 

MPF chuan 4-Tuirial Assembly Constituency inthlanna (bye-election) lo awm turah inthlanna fel fai leh thianghlim a awm theihna turin theihtawpin hma an la niin an thuchhuahah an tarlang. Bial chhunga MPF Local Forum leh Constituency Forum te tlawh chhuakin Political Party tin Candidate te kawm an nih thu te, MPF leh Political Party ten thawhhona thuthlung an lo siam tawh te inhrilh thar lehin inthlanna fel leh thianghlim awm theiha tura tan lak dan te sawiho tawh niin an sawi.

Hetih lai hian tunhnaiah Party hrang hrang ten campaign an kal pui danah Election Commission of India (ECI) in Model Code of Conduct a siam leh Thawhhona thuthlung te kalha hmalak a awm tih MPF chuan a hria a, pawi an tih thu an sawi. TV Special Report leh Video Clip hrang hrang atanga a lan danin sum leh therhlo hmanga vote zawn te, buh inphurhsak te, a thlawna Ration buhfai sem te leh JCB hmanga lei laih sak te leh ruai theh te a awm niin an hria a ni.

Hetiang hi ECI Model Code of Conduct in a phalloh (corrupt practice) leh party te nena thawhhona thuthlung kalh a nih avangin MPF Gen.Hqrs chuan thuneitute hnenah hma la turin an thlen tawh a ni. MPF Gen. Hqrs chuan hetiang hmanga vote zawng lo tur leh thianghlim taka campaign kal pui turin Candidate te leh party worker te an ngen thu an thuchhuahah hian an tarlang bawk. 

MPF chuan mipuite pawh Candidate te tihautak lo zawng leh Thawhhona thuthlu ng pel zawnga beisei neilo turin an ngen a. Bial chhung khawtina MPF Local Forum leh Constituency Forum te pawh theihtawp chhuaha Thawhhona thuthlung hre renga vil tur leh mitmei reng turin an ngen thu an thuchhuah-ah hian an tarlang a ni.

MPF hruaitute atanga ZALEN thudawnna chuan Social media mai bakah khaw hrang hrang atangin (ECI) in Model Code of Conduct a siam bawhchhe zawnga hmalakna thlalak te pawh an dawng tih a sawi a, party tin te chu thawhhona thutlung an bawh chhe deuh vek tawh niin a sawi bawk. BJP chu hetiang lamah sawi la kai lo leh complain an la dawn loh awmchhun a ni.