Aizawl : August 5, 2022 Zirtawpni Mizo Hnam Run chhung inkhawmah MNF Adviser Lalruatkima, Minister chuan, "Hriakthihtu Pathian-in kan hruaitute a ensan ngai lo a, Zoram min enkawla min dawm kang thintu Pathian hian min kalsan ngai lo a, a hun takah kan hruaitute huaisenna a pe thin," a ti.

Lalruatkima chuan, "Tunlai khawvel buaina, mihring leh ran hri leng, lirnghing leh khawvel indo thu thang te, sum leh paia harsatna karah hian, engkim hmulawktu Pathianin MNF chu roreltu atan a ruat a. Hun hmasa lam leh tun thlenga hmasawnna lian tham leh rotling zawng zawng deuhthaw hi MNF hnathawh a ni. MNF chu tawng tam lo, thawk tam kan ni," a ti. 

MNF sawrkar thutiam chungchang sawiin, "Zu chhiah atanga hausak ai chuan retheih deuh zawk kan thlang a. Chutih rualin kan manifesto angin ei leh bar, gas leh oil hnianghnar kan neih theih nan hma kan la a, zirna kawngah leh kawng hrang hrangah, a tha zawnga thil inthlakthleng kan hmu zel a ni. Manifesto tihhlawhtlin tam tak kan nei tawh a, hei hi mipui nawlpui pawhin min teh nan hmang se a tha hle," a ti bawk.

Congress chungchang sawiin, Ruatkima chuan, "World class education min tiamtu party ten, zirna lama min thlen chin kan hmu a. Delhi tlanga President hming sawi tur mumal pawh nei lo te hi nitinin an hniam zel a. An mau put an zo lo a, zawnpui an ngai ta hial zawk a ni. An sawrkar hunlaia sum harsatzia kha mipuiin an la theihnghilh lo a, an hunlaia leiba tam tak, a lu nunga cheng sing nga chuang min battirtu te hian, sum enkawl thiam loa min puhna hi inenlet nan hmang se a tha ang. Hruaitu rintlak nia inngai chuan MADC sawrkar siam tura an party thuchhuak kalha inrawlh, an MLA leh member te chungah action an la ngam tur a ni," a ti. 

MNF Adviser hian ZPM a hmuh dan sawiin, "Treasury khar se tia lawma kut ben tum an awm a, sawrkarna la siam ve reng reng lotu te tan sum enkawl chungchang hi hriatthiam a harsa ang. ZPM-te hian pahnihna nihah hian an lawm tawk zel a ni," a ti.

"Chunglam hriakthih, Pu Zoramthanga kaihhruai sawrkar hi a ngialnghet tawk a, opposition ni chunga buh vawi hnih seng la hmabak ten MNF pan zel ru," tiin sawmna a siam bawk.