Aizawl October 25, 2022 : Higher & Technical Education Minister Dr. R. Lathangliana chuan SSU thupui, 'Kuhnathawh chawisan tih leh zirna atana mahni intodelh' tih chu amah pawhin a lo tawn tawh leh thupuia a ngaihsan thin ber a nih thu a sawi. 

SSU General Conference vawi 35 na a hmanpuinaah Dr. R. Lalthangliana,chuan thusawiin, "Ka thusawi chakna berah thu ka sawi thei hi ka lawm hle a ni. In hnena thu ka sawi dawn tih ka hriat hian  Thufingte bung 10: 4 'Kut dawngdah chuan retheihna a thlen a, taimakna kut chuan hausakna a thlen thin,' tih leh Bible chang dang dang a lo lang a. Kan lehkha ve zir hun lai khan pheikhawk pum pawh kan nei pha lo a, sleeper kan bun a, hna hi kan thawk nasa em em thin a ni. High School ka kal laiin Lo ka nei a, chhipin ka phur zo vek thin. Veng mawng chho lutuk atangin zing karah vawi 10 chuang tui ka kawt a, Gas a la awm loh avangin thal chhungin kum khat daih thing ka pu khawm thin. Bati engah zan rei tak tak thlengin lehkha kan zir thin a, Zotlang Lunglei-ah hetiang hian lehkha zir pahin hun ka hmang thin a. Ka ngaihtuah leta ka inchhir reng reng lo, Pathian hian malsawmna min pek dawn chuan retheih leh thawhrim hmasak a ngai a ni," a ti. 

Dr. R. Lalthangliana chuan, "SSU-te hian in motto ang hian 'kuthnathawh chawisan leh zirna atana mahni intodelh' tih hi vawng zel ang che u. Kei pawh hian M.Phil leh PhD pawh hi a zir hun chhung zawh an tih hmain ka zo hman a, ka zir hun lai khan ni khatah darkar 3 aia tam ka mu lo hrim hrim a ni. Tumruhna, dikna, rinawmna leh taimakna hi a pawimawh ber a, theih loh hi khawvelah a awmlo tih hriat tur a ni. Vawiin hun hian rah tha chhuah se, kan hma hun turah kan ram chhiat leh that innghahna chu nangmahni hi in ni a, Mizo Nationalism vawng nung reng turin ka chah nghal bawk che u a ni," a ti.

Students' Self Support Union (SSU) General Headquarters chuan nimin atang khan Hnahthial-ah General Assembly vawi 35-na an hmang a, vawiin khan G & SA Hall, Electric veng Hnahthialah vantlang inkhawm hun hman niin he hun hi South Tuipui bialtu MLA Dr. R. Lalthangliana, Minister Higher & Technical Education chuan khuallian niin a hmanpui a, T. Lalmuanpuii Chairman, Mizoram Cooperative Apex Bank Ltd. chu khualzahawm a ni bawk.
He hun hi TV. Johan Lalremruata, Vice President, SSU General Hqrs. chuan a kaihruai a, Rev. V. Lalzarliana BCM, Hnahthial Bazar bialtu chuan hunserh a hmang a ni.