Aizawl September 14, 2022 : MPCC President Lalsawta chuan, "Mihringin he lei kan enkawl danah hian Lal Isua'n tawngtai dan min zirtir ang a, i ram lo thleng rawh se, I duhzawng vana an tih angin leia mi'n ti rawh se, tia kan dil a hlawhtlin theih nan Politics hi kan hmanraw pawimawh ber pakhat a ni a, he leia Pathian ram din hi mihringte mawhphurhna a ni, a ti.

Darlawn tlangdung fanga Sakawrdai Community Hall-a Vantlang inkhawmah thu a sawi naah MPCC President Lalsawta chuan, "Pathianin hnam a dinin ram leh mipui a pe a. Ram kan enkawl dan a zirin ram nuam leh ram hreawmah a chhuak ṭhin. Hei hi ram enkawltu, mihringte vang a ni. Van te khi Lalpa vân te a ni a, Lei erawh chu mihring fate a pe a ni tih Bible chuan a sawi. Mihringin he lei kan enkawl danah hian Lal Isua'n tawngtai dan min zirtir anga, ram lo thleng rawh se. I duhzawng vana an tih angin leia mi'n ti rawh se tia kan dil, a hlawhtlin theih nan Politics hi kan hmanraw pawimawh ber pakhat a ni a, he leia Pathian ram din hi mihringte mawhphurhna a ni," a ti.

Lalsawta chuan kuthnathawktute chungchang sawiin, "Kuthnathawktute leh kan thalai tam takte'n eizawnna mumal an neih a, politics-a inchirhthehna leh insawiselna te, kan fate hriat tlak loh pui pui, thu tha lo leh inpuhchhiatna mak tak tak ngaihsak hman lek lova kan hnathawh kan buaipui char char theihna kawng hi Congress Party duh dan leh tum dan a ni. Thlai kan thar tlem thin avangin a hralhna chungchangah kan buai thin. A hralh chhuah lama kan buai lohna turin hralh tham thar chhuak thei turin kuthnathawktute kut hi kan ti chak dawn a. An hnathawhna a pawimawh nia a hriatte Sawrkarin kan tih sak zel dawn a ni," a ti.

Mizoramah eng hmasawnna pawh kan thawh dawnin thil pahnih kan ngaihpawimawh em em tur a awm tih sawiin Lalsawta chuan, "Environment humhalh chunga mihring nun leh rilru chhungril tichhe zawnga hmalak loh te a pawimawh. Kan chenna khawvel hi chenna tlaka chhuah turin environment tichhe lo turin theihtawpin hma kan la dawn a. Mizo te hi hnam ropuia kan insiam theihna tur atana pawimawh hmasa chu moral reforms a ni. Congress Sorkar chuan he thil pahnih, environment chungchang leh moral reforms hi a ngaipawimawh a ni," a ti.

Lalsawta chuan, "Tang puihna hi a inthlahrunawm loh. Khawvel mihausate hi an ṭan em avanga hlawhtling an ni. Congress kan nih avangin tang lo mah ila mi pe tho ang tih rilru kha lo pu lul suh u. Hun thara chuan chhuah kan duh. Kan hnathawhah puih tlakin kan ṭang zawk tur a ni. Tang lo hi tuman an pui rei peih ngai lo. Kan ram siamṭha turin theihtawp kan chhuah a, kan tawngtaina hi Pathian hian a chhan ka beisei tlat a ni," a ti bawk.

Mihring-ah lei theih pahnih an awm tih sawiin, "Pakhat chu Sal an ni a. Sal chuan anmahni leitu tur an thlang thiang lo, a hausa a piangin an duh duh an lei thei. Pakhat leh chu nawhchizuar an ni. Nakumah tuten emaw lei an rawn tum che u, a nih chuan chiang takin lo hrilh rawh u, keini chu lei theih kan ni lo tiin lo chhang rawh u. Kan zahawmna ber kan hralh hian engmah sawi theih kan nei ve tawh lo. Kan tu kan fate tan khawvel thar siam turin i inbuatsaih ang u. Thluaka sum lut hi natna hlauhawm, tihdam theih loh a ni. Kan tu leh faten min chhuah chhalh lohna turin tun aṭang hian ngaihtuahna thar i hmang ang u," a ti bawk.