ZALEN November 4, 2024 : ZPM General Headquarters chuan Party Office-ah Vawiin khan chhung inkhawm an hmang a, he huna thusawitu P&E Minister F. Rodingliana chuan, Zoram mipuiten ZPM Sawrkar-ah rinna an nghah reng thu leh Kawlphetha a Mizoram sawrkar hmalaknate a sawi.

Marova chuan, "Vawiin thlenga ZPM Ministry min beitute hi ZPM Party a dintirha min beitute tho kha an la ni a, min beihrawn chung pawhin Pathian leh mipuite zarah hnehna kan la chang zel hi ZPM Party Pathianin min hruai zia tilangtu leh Zoram mipuiten ZPM Ministry-ah rinna an nghah thukzia tilangtu a ni. Min beihnate hi kan Party tan malsawmna a ni a, kan ram rorelnaa Pathian ram tundin kan tumzia mipuiten min hriatpui chuan a tawk hle a, eptu party ten dawt leh thutling lo hmanga min beihna ah hian buai tur kan ni lo, Pathian leh mipuite kan lama an tan chuan a tawk a ni," a ti.

Power Minister hian Tuirini leh Tuivai Project hun rei tak lo hluihlawn tawh DPR tharthawh leh a nih thu a sawi a, Tuivai Project chim chin tur chu tihhniam a ni chungin 160 MW atanga 180 MW tharchhuah theih a beisei thu a sawi.

P&E Minister chuan, "Mizoram-in tuna kan mamawh san lai ber hian 163 MW a ni. Central sawrkar chuan he project atan hian Vaibelchhe hnih leh nuai sawmriat min pe ta a, thla 18 chhunga zo turin inremna kan ziak ta a ni. A hlawhtlinna kan hmuh hunah chuan Mizoram power mamawh chu kan thar chhuak thei tawh dawn a ni. Tlawng leh Tuichang khuap tur pawhin hma kan la mek a, Tuichang DPR pawh kan peih thawkhat tawh, 52 MW chhuak thei turin ruahmanna kan siam bawk a ni," a ti.

F. Rodingliana chuan, "Tuirial tuikhuah hi sawrkar hmasa hun laiin agreement a fuh lo hle a, sawrkar sum tam tak a thlawnin a luangral nasa hle a, sawrkar lu tihaitu a ni a, a power siam chhuah man to takin kan lei a ngai a, kan lei loh pawhin agreement anga pawisa kan chawi tho a ngai si a, Tuirial tuikhuah khu sawrkar tan phurrit a ni a, Chuvangin sawkar thar hmalakna turah chuan Tuirial project ang hian agreement siam kan tum ve lo a ni," a ti.