Aizawl; Mizoramah August ni 14,2022 atang khan Pathianni ah thlawhna thlawh tan tir a ni a, pasenger an tlem avangin vawiin August ni 21,2022 a service tur erawh thulh (cancel) a ni. Regional Connectivity Scheme hnuaiah Aizawl-Tezpur service a awm theih nan hmalak mek a ni bawk.

ZALEN-in Principal Consultant, Civil Aviation Wg. Cdr. J.Lalhmingliana hnen atanga thu a dawn danin August ni 14, 2022 atang khan Indigo airlines chuan New Delhi to Aizawl direct flight an thlawh tan tir a. Hemi ni hian passenger an tlem hle a, August ni 21 ah pawh passenger an tlem avangin cancel hrih a ni tih a sawi. Zawhna chhangin Wg. Cdr. J.Lalhmingliana chuan, "Tun dinhmunah Indigo, Air India leh Alliance Air te Mizoramah an service mek a. Heng thlawhna te hi Aizawl to Delhi, Aizawl-Agartala-Kolkata, Aizawl to Guwahati leh Aizawl to Shillong te an ni a. Regional Connectivity Scheme hnuaiah Aizawl-Tezpur service turin hmalak mek a ni," a ti.

Wg. Cdr. J.Lalhmingliana chuan tuna Lengpui atanga service mek bak chu tun dinhmunah chuan service dang a ngaihbelh lemlo nia an hriat thu a sawi a. "A hma kha chuan Pathianni ah service a awm lova, Thawhtanni a meeting tur leh engemaw thil tul ti tur te chu Inrinni ah te an kal a ngaih phah thin a. Hei hian harsatna a thlen avangin Pathianni service hi siam a ni," a ti a. Tuna service mek hian mipui mamawh chu a phuhru hrih nia an hriat thu leh mipui ah pawh thlawh belh tir tura ngenna a awm lemlo nia an hriat thu a sawi bawk.