Chhuak dawn, dawn leh lo tih vel boruak hun rei tak chhung chanchin a neih hnuah Paul Pogba leh Manchester United inremna thuthlung chu thla leh khian a zo dawn ta a, man lovin United hi a chhuahsan tur thu puan chian a ni tawh. Kum ruk hmalam khan United hian Juventus atangin a hun laia footballer man to ber ni turin €100m zet sengin an la lut a nih kha. 

Juventus atanga Man United lama a let leh hnu hian kum 29 mi Pogba hian Italy lama a khelh that thin ang kha a phak lo hle a, a hlawh sang em em bakah inhiam neuh neuh a nei ve zauh zauh bawk nen a contract hi an pawt sei duh ta lo niin a lang. Season liam ta khan inhliam vangin game a khel tam lo hle a, game 27-ah chiah United tan a inlan thei.

Pogba hian kum 16 mi lek a nihin French club Le Havre atangin 2009 khan United hi a zawm a, game 200 chuang United tan khel hmanin 2011 khan Youth Cup-ah a champion pui bakah title hlu tak pahnih a chawi pui bawk. Goal mawi tak tak a thun bakah assist thahnem tak a nei bawk. Senior team tan game sarih chiah inlan hmanin a contract chu July 2012 khan a tawp a, free agent niin Juventus a zawm. United a zawm leh hma Junventus lama a khelh lai khan, Pogba hi Turin lamah khan a hlawhtling hle thung a, trophy lian tak tak pariat chawiin chung zingah chuan Serie A title pali lai a tel. 

United lama a kir leh hnu hian khelh that chang nei ve fo mah se chetsual fe fe a ngah a, Coach an neih mumal loh lai nen te a innang chho bawk nen a langsar hlei thei lo. United tana Paul Pogba goal thun hnuhnun ber chu February thlaa Burnley 1-1 a an draw tum kha a ni. 

United a zawm tirh, season hmasa berah khan EFL Cup leh Europa League an chawi a, he trophy pahnih bak hi trophy dang United a cham chhungin a hlawh chhuak leh lo. United tan Pogba hian game 233 khel hmanin goal 39 a thun a, United tan home-a a inlan hnuhnun ber chu Norwich City an hmachhawn tum April thla kha a ni.