Aizawl : Mizorama helicopter service mek Pawan Hans Helicopter te chu tun thleng chuan a la him tawk riha a ngaih thu Mizoram Civil Aviation principal consultant, Wing Commander J. Lalhmingliana chuan ZALEN a hrilh a, helicopter hi chawi belha service-tir char char a nih thu leh mipui tana a tangkai avangin sawrkar chuan mipui rawngbawlnaa a ngaih thu a sawi.
Pawan Hans helicopter-te hian hmarchhak telin state dangah tawhsual an tawk nual tawh a. Mizoramah technical thil chhuanlama cancel a awm thin avangin a hlauhthawnawm a nih leh nih loh ZALEN-in a zawhna chu J. Lalhmingliana chuan, “Thlawhna hi uluk taka enkawl a ni a, hlauhthawnawm a awm lo. Thlawhna tla reng reng hi technical failure aiin 99.98% hi human error a ni. Thlawhna khalhtu kha a pawimawh ber a ni,” a ti.
Mizoram chhung a helicopter service mek a thlawh huna a thlawh loh chhan sawi fiahin, “Thlawhna hi daily, weekly, monthly, quarterly, half yearly leh yearly maintenance tih thin a ni a, khawchin avanga thlawh remchan lohte a awm a, VIP-ten min pawhkawisakte hian kan schedule neih sa hi a buai phah thin zawk,” tiin ZALEN a hrilh.
Sawrkarin thla khatah Rs. 65,51,579/- a pek ziah a ngai a, hemi bakah darkar khatah a hman man hi Rs. 79,007/- a ni. Pawan Hans nena an inremna ang chuan thla khatah darkar 80 a hmang thei a, darkar 80 hi chu an hmang meuh lo niin Civil Aviation lam chuan an sawi.
Tuna inremna an neih mek ang chuan Mizoram sawrkar hian kum khatah Rs. 7,86,18,948/- a hmang tihna a ni a, hemi bakah hian darkar 80 thla khatah an hmang anih chuan thla tina an chawi hi Rs. 63,20560/- a hmang tihna a ni, heti a nih chuan dakara kum khata a hman man hi 75,84,6728/- a hmang tihna a ni a, mahse, darkar hi chu a hmang tling ngai meuh lo tih ZALEN an hrilh. “Fur lai phei hi chuan darkar 30 hman tlin loh thla te pawh a awm,” an ti.
Helicopter hi sawrkar hian chawi belhin a hmang reng tih Civil Aviation lam chuan an sawi a, chutih rualin tuna helicopter service avanga hian sum a teh theih loh nunna tam tak sawrkar hian a chhanaah an ngaih thu pawh an sawi. “Damlo na tak tak te hmunpui lamah kan thlen theih phah a, chubakah mi tam takin an chhungte thite vuinaahte an tel theih phah a. Damlo na tuar tih ngaihna awm tawh loten nung dam te’n an in ngei an thleng a, heng hi sawrkar chuan rawngbawlnaah a ngai a ni,” an ti.
Pawan Hans Helicoper Limited te hian 2010 khan Mizoram sawrkar nen inremna neiin an service tan a, Lengpui Airport leh Thuampui Helipad inkar bakah Thuampui Helipad atanga Kawmzawl, Lung-lei inkar chu bul tan nan hian an hmang. Kum 2013 atanga khan Thuampui helipad atang bawk hian Mizoram khaw pakua-a service turin mi paruk chuan theihna engine pahnih nei, Dauphin Helicopter chu thlawhtir leh a ni. Tunah hian Mizoram khaw eng emaw zatah he thlawhna hi service-tir mek.

Pawan Hans service leh chhiatna

Pawan Hans Helicopter Limited te hian tum riat zet India ram hmun hrang hrangah tawhsual an lo tawk tawh a, chung zinga tum 4 hi India hmarchhak lama thleng a ni.

September 22, 2004 kha khatih laia Meghalaya Community and Rural Development Minister Cyprian Sangma, MLA pahnih leh Deputy Speaker hlui te chu Shillong bul lawkah Pawan Hans helicopter chesual-ah nunna an chan..

August 6, 2010 khan Pawan Hans enkawltu zinga mi chu helicopter kawngkhar a khar tur a tla palh a, a thi zui nghal.

April 9, 2011 khan Pawan Hans Mil Mi-17 chu Guwahati atanga Tawang a pan laiin, lui ruamah a chesual a, kangmeiin man zuiin, a chuang mi 23 zinga 17 chu an thi.

April 29, 2011, khan Pawan Hans AS350 B-3 helicopter, khatih laia Arunachal Chief Minister Dorjee Khandu leh mi dang pali phurtu chu chin hriat lovin a bo a, ni li hnuah Lobthang-ah hmuh niin, a chuang zawng hi an thi vek.