Aizawl June 12, 2024 : Vawiin chawhma dar 11 vel khan Dawrpui, Aizawl-a Mosque bul dawrah dawr nghaktu kah a ni a, a kaptu hi Police ten an man nghal a, a kaptu hian a kah lai a hre mumal lo niin a sawi a.

Aizawl Police Station atanga ZALEN thudawn danin pistol-a mi kaptu hi Lalnunsanga (32) s/o Hrangthuama (L), Armed Veng South nia inchhal a ni a, police ten an man lai pawh hian a rui niin an sawi a, pistol hian dawr nghaktu ke zungpui-ah a kap a ni.

Police te sawi dan chuan a kah hnu pawh hian tlanchhiat a tum lem lo an ti. A mi kah hi ngaihtuahawm lutuk erawh a ni lo nia thudawn a ni.

Police lam atanga thudawnna chuan Mi kaptu hi No. 4 khawih thin a ni a, a rui chak chuan dawr nghaktu hi pawisa a dil a, mahse, dawr nghaktu hian a pek duh loh avangin rikrap nan hian silai hi a hmet puak a, a ke zungpuiah-ah a fuh ta niin an sawi a, a kaptu hian a kah dan a hre mumal lo niin a sawi.

Lalnunsanga hian a sawi dan chuan a pistol hman .22 hi miin siam tura a hnena an dah niin a sawi.