Aizawl May 11, 2024 : Mizoram tlawmngai pawl hrang hrang intelkhawm, NGO Coordination Committee huaihawta Sairang to Hmawngbuchhuah inkar rel kawng chungchang sawihona a tel pawl hrang hrang aiawhte chuan tun dinhmunah Sairang thleng bak rel kaltir an duh lo tih an sawi.

Sairang/Sihhmui atanga Mizoram chhim tawp, Hmawngbuchhuah thleng rel kawng km 223-a thui siam tum chungchangah Zirtawpni khan Central YMA Committee Room-ah NGO, political party leh khawtlanga mi rawnkaite nen sawihona neih a ni a. He huna NGO aiawha tel Mizoram Environmental NGO Coordination Committee, Centre for Environment & Social Justice (CESJ) leh Mizoram Merchant Association (MIMA) te chuan rel chu Sairang thleng felfai takin lo kal phawt se, a that leh that loh hriat hnuah muangchangin hmathar lak leh nise an duh tih an sawi hlawm.

Inrawnkhawmnaa tel political party zingah BJP aiawh tih loh chuan Hmawnbuchhuah thlenga rel kaltir chu an duh hrih lo tih an sawi a. Rorel lai, ZPM aiawhte chuan Sairang thleng kaltir phawt a, a bak chu chhim lam nen inrawna thutlukna siam tha an tih thu an sawi.

Congress (MPCC) aiawhte chuan Hmawngbuchhuah thleng rel kaltir a nih chuan duhtawkin Mizoram chu sawisak a ni dawn tih sawiin rel kawngin a pawh tur Myanmar leh Bangladesh-ah tual chhung buaina a awm avangin an la inpeih lo bawk niin an sawi.

PC leh ZNP aiawhte chuan Sairang thleng kaltir chu an duhtawk hrih tih an sawi a, BJP erawh chuan rel kawng hi Mizoramin a thatpui dawn niin an sawi thung.

He inrawnkhawmnaah hian MNF party aiawh an tel lo thung.

Rel kawng chungchang sawihona hi Central YMA President Lalhmachhuana chuan a kaihruai a, inrawnkhawmna an huaihawt chhan chu NGO Coordination Committee in rel kawng chungchangah hian zau zawka inrawnkhawmna buatsaih nise a tih vang niin a sawi a. "Rel kawng kaltir hrim hrim hi kan dodal a ni lova, eng chin nge kan ngaihtuahnaah hian awm tih kan hre duh a. Rel kawng kal chhan ber tur Myanmar lam an la buai bawk avang hian kan la inpeih lo niah kan ngai a. Rel kawng hi kaltir anih chuan kan thing leh mau hian nasa takin a tuar dawn a, kan hlawkpui tur a awm rualin kan hloh tur pawh engemaw zat a awm dawn a ni," a ti a. Rel kawng chungchang chu NGO Coordination Committee te la sawiho lehin a tul anga rawn awmte an rawn hnuah sawrkarah thu thlen leh an tum tih a sawi bawk. 

Railway Consultant R.Hrangtawna sawi danin Bairabi atanga Sairang thleng rel kawng Km 51.38 a thui hi ni 15.12.2015 atanga thawh tan a niin tun dinhmunah hna 92% zawh a ni tawh a, December 2024 ah chuan Sairang thlentir tum a ni a ni. Sairang atanga Hmawngbuchhuah inkar hi Km 223 a sei tur a niin a senso atan hian vaibelchhe 15006.96 ruahman a ni.