Aizawl: Mizoram sawr-karin Covid 19 avanga inkharkhip kalpui zel a tum chu mipuite himna a nih dawn avangin pawl hrang hrang hruaitu ten tha an tih thu Zalen an hrilh.

Mizoram Journalists' Association President Zonunsanga Khiangte chuan, "Lockdown hi chhunzawm zel tha ka ti ni mai lovin, chhunzawm hi a la tul hlein ka hria a. Covid-19 positive tam tak nei Assam leh Tripura te, chhak lamah Myanmar leh thlang lamah Bangladesh ten min hual vel bakah, India ram hmun hrang hranga tang-khang kan unau leh nau, tu leh fa sing chuang an lo haw dawn a, an lo thleng mek tawh a. Heng zawng zawng han ngaihtuah hian Lockdown chhunzawm hi chu a la tul hrim hrim a, pawhsei vawi 4-na bak pawh hi a la ngai zel lo vang tih pawh a sawi theih rih lohva, kan hun tawngin a rawn hril zel ang chu," a ti a. Lockdown kalpui dan chungchangah, "Tuna kan kalpui dan hi kan zawh tawk ni rihin ka hria a, face mask vuah taimain social distance zawm tha bawk ila. Pawimawh tawpah lo chuan chhuak lovin inah tawm tam ila a pawimawhin ka hria. Kan sawrkar hma-lakna hi khawimaw laiah chuan duhthusam lo lai te chu a awm mai thei e, theihtawp a chhuahna hi a lawmawm hlein ka hria," a ti bawk.

Mizo Hmeichhe Insuihkhawm Pawl (MHIP) President Lalthlamuani pawhin lockdown chu chhunzawm zel tha a tih thu Zalen a hrilh a, "Mizo society hi inkawm tel tel, inkuah thuak thuak thin kan ni a. Hei hi tuna kan hrileng mek darh hlauh-awm dan ber a ni a. Hrehawm deuh mahse la in control deuh hi tha ka ti a ni," a ti.

Mizoram Upa Pawl President Lalhuapzauva pawhin inkharkhip chhunzawm zel chu tha a tih thu a sawi a. "Tunah hian India ram hmun hrang hrang atangin an lo haw khawm mek a, hei bakah kan chhehvelah te Covid 19 hi hmuh anih avangin lockdown chhunzawm zel hi tha ka ti a ni," a ti. MUP President chuan lockdown chu tun aia khauh zawka kenkawh a duh tih Zalen a hrilh bawk a. Ramri a duty te chu duhsak an ngai tih a sawi.

Mizorama sumdawng intelkhawm pawl Mizoram Merchant Association (MIMA) President PC Laldinthar chuan lockdown chu thlawp mahse sumdawng te tan harsatna tam tak a awm niin a sawi a. "Tunah hian sumdawng 80% vel hi an mangang tawh a, hetih karah hian sawrkar lamin tax chhunglut turin min ti a, mahse chhunluh tur pawh kan nei dawn lova. Kan sumdawnna hmun lian te hi chu a ni inchhawk ten hawn min phalsak thei se kan duh hle a ni," a ti. MIMA President chuan inkharkhip avangin sumdawng ten harsatna an tawk nasa tawh hle niin a sawi bawk.