Aizawl July 13, 2022: Champhai leh a chheh vel khua fang mek ZPM Leader Lalduhoma chuan, Kan ram siam tha tur hian kan zavai hian a mawh kan phur a. Pawn atanga ram vei mai lovin a chhungah kan luhchilh a ngai a ni, a ti.

Tuipui, Ruantlang leh Zotlangahte vantlang inkhawm a neih naah Lalduhoma chuan, “Pathian hian amah ringtute hi leilungah hrisel taka awm turin min hrilh a, tunah kan ramah natna chi hrang hrang vei kan tam zia ngaihtuah hian tih dik loh kan nei a ni tih hi i hre tlang ang u. Tin, Pathian hian damreina min tiam bawk a, Mizote hi khawvela dam rei lo ber hnam nen kan dam rei chhung a in chen thuak a ni. Kan eizawn danah te hian bukna dik lo kan hmang nasa tawh em em a, dam rei ngaihna hi a awm lo a ni. Kristiante chu puktu ni lovin a puktirtu ni zawk turin Pathianin min hrilh a, mahse tuna kan ram leiba dinhmun hi a hrechiang apiangin a rapthlakzia an hria. Kan ram siam tha tur hian kan zavai hian a mawh kan phur a. Pawn atanga ram vei mai lovin a chhungah kan luhchilh a ngai a ni,” a ti

Duhoma chuan, “ZPM hun a inher chhuak mek niin a lang a, kan mithiam rualte nen ruahmanna siamin Pathian leh mipuite zarah sawrkarna siam tur hian kan inpeih tawh hle a ni,”  a ti a. “Kan ram kan hnam damna tak tak chu Pathianah a awm a, leilung leh a chhunga awm zawng zawng hi Pathian siam leh a ta an ni a, a enkawltu turte pawh keini mihringte kan ni. Pathian thil tum chu khawvela a ram din a ni a, vanram kai kan tum a nih chuan lei-ah Pathian ram kan din phawt a ngai a ni,” a ti.