Aizawl : Vawiin September ni 7, 2022 (Nilaini)-a PC Party Office Bearer meeting chuan an President Lalhmangaiha a chawlh tak avangin acting president atan Sr. Vice President ni lai Vanlalruata an ruat a, September 22, 2022 hian General Assembly an ko a, party hruaitu tur an thlang nghal dawn.

PC Party thuchhuak chuan, "Kan President Lalhmangaiha Sailo-in thalai zawk tana nihna a ken tak avangin vawiina OB Meeting chuan lungrual takin Acting President atan Pu Vanlalruata Sr. Vice President kan ruat, a ti.
    
President hna lo chelh lailawk tur Vanlalruata chuan, "PC Party President Pu Lalhmangaiha Sailo-in President nihna a chawlhsan chungchangah zawhna tam tak kan dawng a. Pu Lalhmangaiha'n a sawi tawh angin kum upa lam leh taksa chak lo  chho zel a nih avang te, thalai zawk te kuta Party hruai hna kentir a duh tawh avang te a ni ber a, hetiang rilru a pu hi ka ngaisangin ka zah tak zet a ni," a ti.

PC Party OB Meeting hian September 22, 2022 (Ningani)-ah General Assembly neih hun atan an ruat a, hetah hian party hotu tur an thlang dawn a ni.