Aizawl January 27, 2023: Vawiin khan PC Party chuan an Party Office kum 40 chhûng an luah tawh chu, building thar an luah leh hma atan an chhuahsan fel.

Vawiina Party office-a an hun hnuhnung an hmanah hian Lalhmangaiha Sailo (Emeritus President) chuan, "Kan Party office hian Chief Minister, Minister leh MLA chhuanawm tak tak engemawzat a lo hring chhuak tawh a; Kum 40 chhûng kan Party office kan luah chhûnga kan ram tana theihtawp chhuaha lo bei tawh te zahna chibai ka buk a ni. Building thar kan luah hunah chuan PC Party leh kan ram tana thahnemngai taka lo thawk thin, nung dama la awm te neitu chan chang leh vek turin ka sawm a ni," a ti.

Meeting kaihruaitu Vanlalruata President chuan, "Brig.T.Sailo-a kaihhruai PC Sawrkarin ram tana hmathlir thui tak neia engemaw chen an kalpui tawh chu Kum 30 chuang chhunzawm mumal lo a la awm hi PC Party chuan kan ram dinchhuah nan leh hmasawn nan kan chhunzawm zel dawn a ni," a ti.