ZALEN October 24, 2024 : PC Party chuan vawiin khan General Assembly an hmanga he hunah hian an Party President Vanlalruata chuan Mizorama raltlan awm mekte khungkhawma khuahkhirh an duh thu a sawi.

Ruata chuan, "Tanpui mamawh avanga min beltu te humhim leh enkawl hi Mizo nunphung a ni a. Raltlan te tha taka enkawl turin kan Pathianin min duh a ni," tiin Mizorama raltlan lo lut chu eng mi pawh ni se an mamawh mila humhim leh enkawl tur nia PC Party in an ngaih thu a sawi.

PC Party President chuan, "Chutihlai chuan kan ration min tawm ngawt tur a ni lo a, kan chanai min chanpuiin min chhuh sak tur a ni lo," tiin, "Raltlan te hi refugee camp siam a khungkhawm vek a, awmze neia enkawl a tul kan ti," a ti.

Tunhnaia raltlan an rawn pun hma leh pun tirh atanga hei hi an lo aupui tawh thu sawiin, "Thuneitu ten ngaihtuah chiang duh lovin zalen takin kan awm tir a, a pawizia kan hre tam tial tial a. Buaina leh harsatna lian zawk a thlen hmaa raltlan te hi khungkhawm a, awmze neia enkawl a ngai a ni," a ti bawk.

Assembly-ah hian inthlanna neih nghal niin Returning Officer R Zatawna kaihhruaiin hruaitu thar thlan a ni a; President atan Vanlalruata, Vice President atan Lalthuamliana leh Treasurer atan Lalsangpuii te thlan tlin an ni.State Council Meeting neiin Executive Committee Member an thlang bawk a ni.