Aizawl September 5, 2022 : Vawiin khan PC Party elected Office Bearer te chu an President Lalhmangaiha Sailo chenna Tuivammit-ah an thukhawm a, he hunah hian an president cchuana a chawlh tur hi a puang a, thalai zawk kutah party kaiihhruai hna chu aawm zawk se tha a tih vanga chawl tur a nih thu a sawi.

President Lalhmangaiha Sailo-in a chawlh tur thu a puan takah hian September 7, 2022 (Nilaini) khian an party kal zel dan tur relin meeting an ko nghal a ni.

Lalhmangaiha Sailo thuchhuah pawh a siam nghal a, a thuchhuah siama hi a ngai ang aanga rawn dah a ni. 

Thian duh tak te u,

Pathian malsawmna dawnga sawrkar hna ṭha tak ka thawh hnuah kan ram siam that ka duhna avanga politics zawmin MPC Party-ah kum 10 chhung President ka ni a. MPC Party leh PRISM Party inzawmkhawma PC Party kan nih hnuah kum thum hmel hmu President ka ni bawk a. Heng hun chhung zawnga min hruaitu Pathian hnenah lawmthu ka sawi a. Ka thawhpuite leh min thlawp leh min puitu zawng zawng chungah lawmthu ka sawi a. MLA inthlana ka dina min puitu leh min vote-tu zawng zawng te, party ka kaihhruai chhunga kan party tana thawktu leh kan party vote-tu zawng zawng chungah lawmthu ka sawi bawk a ni.

Political party-a ka tel leh MLA Inthlan te chuha ram hruaitu nih tuma ka beihna te hi kan Ram leh Hnam tan ka thiam leh theihna te hmang a kan ram hi hma sawnpui ka duh vang a ni a. Ka pain kan ram hmasawnna tur a duan te kha kan ramin a mamawh ni a ka ngaih avangin tihhlawhtlin ngei ka duh tak meuh a ni.

Kan Ram leh Hnam tana beih zel hi ka duhin ka la tum a; chutihlaiin, kum upa lam ka lo ni ve ta reng mai a, hriselna te pawh a lo tlahniam ta a. Ram leh Hnam tana beihna, political party kaihhruai hna hi kum naupang zawk, la chak ṭha zawk leh tunlai mila ngaihtuahna hmang a, hna thawk thei kuta a awm ṭha ka ti a. Chuvang chuan party president ka nihna hi chawlhsan a, ṭhang thar zawk kuta hlan ka tum ta a ni.

Vawiin, September ni 5, 2022 hian kan Party Sr. Vice President Pu Vanlalruata kutah hian kan party hruai hna ka hlan a. A ni hian ka pa vision-te tipuitling a, kan ram leh hnam hian hma a sawnpui theih ngei ringin keimah leh kan chhungkua, T. Sailo family zawng zawng chuan kan thlawp zel dawn a. Kan party mi leh ka thawhpui zawng zawng te, min thlawp leh pui ṭhintu zawng zawng te leh mi zawng zawng, amah hi thlawp a, pui turin ka ngen takmeuh che u a ni.

Pu Vanlalruata kaihhruai hian kan Party kal zel dan tur leh hruaitu siam fel dan tur pawh rel a ni ang a. Pathian kaihhruaina nena kan Ram leh Hnam hmasawnna atana hlawhtlinna thawk chhuak turin duhsakna ka hlan a ni."

Ka lawm e.
Lalhmangaiha Sailo
President,
PC Party
Gen Hqrs., Aizawl
September 5, 2022