Aizawl: India hnampa Mahatma Gandhi piancham kum 150 na pualin nimin zing khan khawvel hmun hrang hrangah hun hman a ni a, Mizoramah pawh dar 7:00 khan Aizawl huam chhunga Cubs & Bulbuls, Scouts & Guides, Rovers & Rangers, Commissioners 700 vel kal khawmin Chanmari kawn atanga PC Girls School, Mission Veng thlengin “Peace Run” hi neih a ni.

“Peace Run” hi Chanmari Veng kawn ah Zohmingthanga, District Chief Commissioner Aizawl & District Education Officer, Aizawl chuan a vailiam a, P.C Girls School Mission Vengah kharna hun hman a ni. Kharna hun hi John Tanpuia, Headquarters Commissioner (Scout) & Joint Director Sports & Youth Services Department chuan a kaihruai a, Lalzarmawii, IAS State Commissioner(Guide) & Director, School Education Department chu Chief Guest niin a hman pui.

Chief Guest chuan kalkawmte hnenah Climate Action For Peace thupui hmanga thuchah sawiin, thing leh mau te ti cherem mai lova humhalh tu ni zawk tur leh phun belh sauh sauh turin a kalkhawmte a fuih a, boruak tha leh ram thiang -hlim kan neih theih nan bawlhhlawhte a paihna tur hmun dik takah paih a pawimawh thu inzirtir chhawng zel tura chahin, kan tanrual chuan kan ram hi remna leh muanna hmangin ram nuam leh thianghlimah kan thlak theia, chutiang a ti thei theuh turin kalkawmte hian chanvo leh mawhphurhna kan nei a ni, a ti.