Aizawl May 11, 2024 : Petroleum Entrepreneurs’ and Transporters’ Union of Mizoram (PETUM) chuan Directorate of Food, Civil Supplies & Consumer Affairs Department thuchhuah (Office Order, Dated: Aizawl the 10th of May, 2024 no.I.21011/2(D)2018/DTE(SPY)GEN/Loose)- in thu hriatna rintlak leh chhui chianna pawh awm hmasa lo a Petrol Pump neitute zawng zawng vaukhanna niawm tak a thuchhuah a siam mai leh Trade Licence cancel sak hial tura hma lak a tum hi a mak an tiin hriatthiam har an tih thu an sawi.

PETUM chuan Tuialhthei lakluhna kawngah harsatna awm mahse a theih ang ang a Petrol Pump neitute leh a Phurtuten’ Mipui mamawh phuhru tura an thawh ve mek lai a, thuchhuah dengkhawng tak a awm ta mai hi a mak kan ti a, Food, Civil Supplies & Consumer Affairs Department thuchuah ang a Sawrkar thuchhuak kalha Petrol/Diesel hralh an awm a nih chuan dan hmanga hma lak mai tur ni awm tak a nih lai a Petrol Pump neitute laka mipui rilru dik lo puttir thei tur ang zawng a thuchuah a awm ta mai hi keini Petroleum Entrepreneurs’ and Transporters’ Union of Mizoram (PETUM) chuan pawi kan ti hle a, tun hnuah chuan chhui chianna nei hmasa lo a thu dengkhawng tak inchhuah khum hi thleng tawh lo se kan ti hle a ni," an ti.

"Mizoram hian Petrol leh Diesel lakluh kawngah tun hma atangin harsatna kan lo tawk fo tawh thin a, Mizoram in Oil Depot kan neih ve loh avangin harsatna hi kan tawk hma thin hle. Hei vang hian Oil Depot neih ve ngei pawh hi kan nghakhlel hle a, Mizoram in Oil Depot a neih ve ngei theih nan a Sawrkar hmalakna pawh beiseina sang tak nen kan thlir mek a ni," an ti bawk.