ZALEN, May 06, 2025: Lynchpin leh ZALEN buatsaih, zirlaite tana zir chhunzawm zelna tur chungchanga zirna in nena hmaichhana inkawma inhrilhfiahna leh inbuaipuina, ni hnih awh tur, Edufest 2025 chu Thawhlehni khan Aizawla Millenium Centre Rooftop-ah tan a ni a, Nilaini hian chhunzawm a ni ang.

A huaihawttute chuan, "Pawn lam college-a zirna dap mekte tan zirna in (university/college)-a thawkte ngei, a kara mi dang (middleman) tlazep lova hmaichhana indawrtir hi Edufest-in a tum ber chu a ni a, internet lamah thil tam tak hriat theih ni mah se hmaichhan ngeia indawr tluk a awm lo," tiin an sawi.

Edufest-ah hian state hrang hranga private university leh institution tha tak tak bakah central sorkar atangin air force an inpho a, scholarship chungchang te, admission leh free counselling te, medical, paramedical course, nursing, dental, pharmacy, engineering, computer science, humanities, fashion designing zirna chungchangte a zawh fiah theih a, a zir duhte an kaihruai thei bawk.

Kum tin huaihawt thin Edufest hi hi Mizo zirlaite tam takin an lo chhawr tangkai tawh a, phai zirna in thaah admission hmuin hna hmuh kawngah an tangkaipui tawh thin bawk.