ZALEN June 18, 2025 : NGHAM chuan sawrkar sum senga enkawl, sawrkar hospital-te hian MUHCS hnuai-ah hian cashless-in damlo enkawl hi kalpui chhunzawm se, private hospital-ah erawh phailam hospital thenkhat sawrkarin a ziahluh loh leh pawm loh (Non-Empanelled Hospital)-a an phalsak ang tho hian damlote hian an bill hi MUHCS Package Rate ang hian reimburse/bill leh theih se, an zawm nghal tur thu thuchhuah an siamah an tarlang.

Non-Government Hospital Association of Mizoram (NGHAM) chuan a hnuai ang hian thuchhuah an siam.

Mizoram Universal Health Care Scheme (MUHCS) hi sawrkarin April ni 1, 2025 atanga hman turin a puang a. Mizoram-a private hospital inzawmkhawm pawl, Non-Government Hospital Association of Mizoram (NGHAM) erawh chuan a kalphung mumal tawk lova hriain kan la zawm ve rih lova. Kan harsatna te chingfel tura sawrkar thuneitu hrang hrang nena vawi eng emaw zat sawiho a ni tawh chung pawhin inremna ala awm thei chuang lova, a pawi kan ti hle a ni. A nghawng hi a nasa em em a, mipuiin nasa takin harsatna an tawk tih kan hria a, min hriatthiam hram hram kan ngenin kan beisei a ni. Tun dinhmuna MUHCS kan zawm ve theih rih loh chhan hi mipui hnenah hrilhfiah a tulin kan hria a, kan han puangzar ta a ni.

1. MUHCS hi damlo ten Damdawi-In awmna bill an chawi ngai lo (cashless) tura ruahman leh kalpui a ni a, chumi awmzia chu an awmna Hospital-in a tul ang apiangin an lo enkawl ang a, a senso tul zawng zawng an lo tum sak ang. Damdawi-In ten sawrkar ah damlo bill an thehlut ang a, sawrkar-in Damdawi-In hnenah damlo enkawlna man hi a peksak thung dawn a ni. Hetiang hi chuan hospital-ah nitina pawisa lut a awm dawn lova, nitina damlo enkawlna senso hi a hautak tham em avangin, ba ringawta damlo enkawl hi private hospital-ten kan tlin lo a ni.

2. MUHCS hnuaia damlo enkawlna man (rate) hi tuna Mizoram-a private hospital-a kan rate hman tlangpuite aiin 50% - 80% velin a hniam zawk a, a awmzia chu man tlawm taka damlote a ba thlau ni bawk si a, enkawl tura beisei kan ni. Mizoram-a private hospital-te’n damlo kan enkawlna man leh room mante hi phailam a private hospital tam berte aiin nasa takin a tlawm zawk a, chumi aia tlawm leh zuala damlo enkawl hi kan dinhmunah thil theih loh tluk a ni. Hei hian damlo kan enkawl te hi enkawlna tha (quality service & care) pek kawngah nghawng thalo a neih mai a hlauhawm hle bawk. Chuvangin hetianga man tlawma damlote kan enkawl chuan kan Damdawi-In te hian tlakchhiat kan hmabak a, kan thawktu tam tak (Doctor, Nurse leh thawktu dang) hlawh pek tur kan nei lo thuai ang a, hna an chan phah dawn bawk a ni.

3. Phailama Corporate/Private Hospital, rate sang tak hmangte nen Mizoram sorkarin MUHCS inremna an ziak thei hi a tha kan tih rualin Mizoram private hospital te tana rate min chhawpsak nen a inanglo hle tih hriat a ni. Hei bakah hian MUHCS hnuaia damlo an enkawl tur te hi Phai lam hospital te tan chuan tlemte chauh an nih avangin, a ba thlau (cashless) a enkawl hi an tan thil harsa a ni lova, Mizoram-a private hospital-te tan erawh damlo kan enkawl zawng zawng deuh thaw hi MUHCS hnuaia enkawl tur an nih dawn avangin cashless ringawt chuan enkawl an harsa dawn a ni.

4. Sawrkar nen MUHCS chungchangah hian inbiakna kal lai awm bawk mah se, rate chungchang leh a kaihhnawih thil dangah tihfel harsa leh ngaihtuah tur tam tak la awma a lan avangin mipuite harsatna tawh mek hi awlsam taka tihtawp a nih theih nan Sawrkar sum senga enkawl, Sawrkar hospital-te hian MUHCS hnuai-ah hian cashless-in damlo enkawl hi kalpui chhunzawm se, private hospital-ah erawh phailam hospital thenkhat sawrkarin a ziahluh loh leh pawm loh (Non-Empanelled Hospital)-a an phalsak ang tho hian damlote hian an bill hi MUHCS Package Rate ang hian reimburse/bill leh theih se, sawrkar pawisa engmah a hek belh lo bawk ang. Hetianga Mizoram sawrkarin a ti thei a nih phawt chuan mipui harsatna tam tak chu a su kiang ngei dawn a, keini NGHAM pawhin kan thlawp nghal dawn a ni.