Aizawl : Inrinni zinga Assam leh Mizoram inrina hrul, Phainuam a mimal rama Bengali Medium School Building-a bomb tih puahna hmun chu Mizoram Police te leh Mizoram Forensic Team te chuan a hmunah an kal chilh.

School Building hi a chhe nual niin hriat a ni a, He thil thleng avang hian Pu Lalbiakthanga Khiangte, DIG (Northern Range) pawh a hote nen a hmun an pan nghal a ni. Sawrkar chuan hetiang thil a thleng hi pawi an tih thu an thuchhuah an siam a, A rang thei ang bera chhui chhuah a nih theihna turin sawrkar chuan hma a la chhunzawm zel dawn tih an tarlang. Vairengte Police Station-ah case register nghal a ni.

Mizo Students' Union (MSU) General Headquarters, Aizawl pawhin thuchhuah siamin, Inner Line Reserve Forest Area chhung Buarchhep phai Assam State awpna hnuaia awm meka Dan lova pem lut misual te'n Upper Phainuam (Painom) LP School an suasam vak chu a dem takzet tih an tarlang a, Assam mipui leh Mizote chotuahna leh NE mipui inunauna tihchhiat tumnaah an ngai a, Dan zawm tha Mizo mipuite hmai tih balh tumna niin a ngai tih an tarlang.