Aizawl: Defence Ministry hnuaia Defence Research & Development Organization (DRDO) chuan PHE Secretary Shri Amjad Tak kaihhruaiin Biodigester Technology chu Zirtawpni khan Aijal Club-ah PHE Department hnenah a hlan.

He huna kalkhawmte hmaa thu a sawinaah Director of Defence Research Laboratory, Tezpur, Dr. S.K. Dwivedi chuan, “Mizorama Biotoilet (Biodigester) hman tura chhawpchhuah a ni ta hi faina kawnga hmasawnna mellung pawimawh tak a ni a, Mizoram chu tui lamah a hnianghnar avangin hamthatna nasa tak in nei bik dawn a ni. Biotoilet hi hmanna hmun a zirin a technology pawh a dang hret hret a ngai dawn a, ek lo eitawihtu Anearobic Microbial Innoculum chet dan hi danglam thei a ni tlat a ni,” tiin, “He hmarua thawh dan chungchanga rawtna tha zawk in neihte chu Tezpur-a kan scientist-te hian an lo ngaichang reng dawn a ni,” a ti bawk.

UD&PA Director Shri Joseph Lalramsanga pawhin DRDO ten hlawhtlinna duhawm tak an nei leh thei chu a lawmpui thu a sawi a, tuna an hmuhchhuah thar a hlawhtlin zual zel theih nan media-te chu an pawimawh tak zeta a ngaih thu a sawi ve bawk.

Biodigester hi DRDO-in Kum 25 chhung an zir chian hnua an hmuhchhuah a ni a. Biodigester-ah hian mihring ek eiraltu tur hrik, Anearobic Microbial Innoculum (AMI) a awma, chu chuan mihring ek lo lut thar apiang an lo eiral zel avangin septic tank angin a khat ve dawn lo a ni.

Biodigester technology hi DRDO ta a nih avangin a duh apiangin lo siam ve ngawt phal a ni lo va, DRDO-in Licence an pekte chauhvin an siamin an sa thei a ni. Tunah hian PHE Department chu Biodigester technology hmang thei leh DRDO Licence neitu a lo ni ta a, Biodigester duh leh mamawhte tan PHE Department hi a dawr theih tawh a ni.

DRDO-ah hian branch hrang hrang 56 awmin, tuna he Biodigeter technology duang chhuaktu Life Science hi branch pakhat a ni.