ZALEN June 5, 2024; Vawiin ni 5.06.2024(Nilaini) chawhnu khan Central YMA hnuaia Health & Sanitation Sub- Committee te chuan Reiek kai, Tlawng luia PHE Tui Pump-na hmun, tunhnaia ruah sur nasa in a tihchhiatna hmun te an tlawh a. PHE Department atangin EE, SDO, JE leh thawktu dang ten an lo dawng sawng.

PHE Department hotute hian tunhnaia tuilianin Tui Pump-na hmun a tihchhiat dan te an hrilhfiah a, hmunhma te an fan kual pui bawk.

Central YMA hruaituten an report danin Tui lianin a chim vang a bungrua a tih chhiat leh bungrua a len bo te hi Rs. vbc. 13 vel hu ni a hriat a ni.

Phase- I ah hian Store Room pahnih hi tui lian hian a ti chhe hneh hle a,spare part hlu tak tak engngemaw zah a len bo bakah Store Room bula an khawl lian dah te pawh tuiin a chim vek avangin tun maiah chuan a chhiat that hre turin tih nun ngam a la ni lo bawk.

Phase -I a tui pump khawl electric hmang pahnih te hi tui in a chim ve bawk avangin Technician ten a chhiat dan an chhui mek a, khawl hi eng chen nge hman theihloha a awm tur hi ala hriatloh. Backup pump (diesel hmang ) pahnih an neih ah pakhat hi a chhia a, pakhat chauh hman theihin a awm rih. Tun tum tui lian hi kum 2017 a tuilian in a chim chin aiin feet 5 chuang a sang a chim a ngaih a ni.

Thawktu ten theihtawp an chhuah zarah karkhat chhungin 85% capacity in Phase -2 pump thawk thei a siam hman a ni. Amaherawhchu hei pawh hi tui nut dan a zirin a danglam thei thung. Tui a nut deuh hian Phase -2 a Pump pakhat leh Phase 1 a diesel pump khawl hmangin tui an pump thin a, phase 2 pump pahnih 85% a an pump hian nikhat ah maktaduaih 18 vel an pump thei ni a hriat a ni.

Tui hi an pump na hmun ah hian chirhdum a tam em avangin vawiin thleng hian pump karlakah dum thenfai hna thawh tel zel a ngai a, thawktu te pawh an hahin an thawkrim hle.

Central YMA leh PHE Department te hian Tuihna humhalh chungchang leh Faina leh Thianghlimna chungchangah thawhhona thuthlung ziakin Coordination Committee siamin an thawkho mek a ni.