Phir unau pahnih pawh hmuh tur an tam loh laiin, Mali-a nu pakhat chuan a rualin fa pakua zet a hring hem mai - rapthlak lamah a kal lek lek zawk! Heng phirte hi kum hnih an tling dawn tawh a, thla 19 chhung Morocco-ah enkawl an nih hnuin an ram Mali-ah an kir leh tawh a ni. 

Heng unau phir pakua te hi an dam chhuak vek a, Guinness World Record a ni nghe nghe. Phir pakua piang hrim hrim hi chu tum hnih an lo awm tawh a, an dam chhuak lo vek thung. 

Kum 2021 khan Mali-a nu pakhat kum 27 mi Halima Cissé chuan fa pakua te hi a hring a, a hrin hnu hian Morocco lamah enkawlna tha zawk dawng turin naute te nen hian thawn nghal an ni. Thla 19 chhung zet enkawlna an dawn hnuah Morocco atangin an ram Mali an thleng leh tawh a ni. 

Phir pakaw zinga panga hi hmeichhia an ni a, a bak mi pali te hi chu mipa an ni. Hmeichhia te hi - Kadidia, Fatouma, Hawa, Adama leh Oumou te an ni a, mipa te hi Mohammed VI, Oumar, Elhadji leh Bah te an ni. An pian hlima an rih zawng hi 500g leh 1kg inkar vek an ni. 

Naute pa Abdelkader Arby chuan, "An zavai hian mize danglam tak nei vek an ni, a then an ngawi chawi em em a, a then an bengchheng hle," tiin a fate chungchang a sawi. Arby chuan an ram Mali-ah chuan an lar hle tih sawi bawkin, an fate chu mit ngeia hmuh duh an tam hle tih a sawi.