Aizawl: Mizoram hmun thenkhata mihring ruhro lakkhawmte bel chiang tur leh an DNA sample te laa, zirchiang zui tura Archeological Survey of India (ASI), Aizawl Circle hmalaknaa lokal mithiam pathumte chuan nimin zing khan ASI, Aizawl Circle leh INTACH, Mizoram Chapter-te huaihawtin Aijal Club-ah anmahni kawmna hun hman a ni a. He hunah hian ASI, Aizawl Circle enkawltu Dr. Sujeet Nayan leh INTACH, Mizoram Chapter hruaitute bakah Art & Culture Department aiawhte, Mizo Archeological Society hruaitute leh MZU atangin mithiamte an tel a ni.

ASI atanga lokal te hi hi Dr. Niraj Rai, Birbal Sahni Institute of Palaeosciences, Lucknow leh University of Chicago a zirtirtu Dr. Maanasa Raggavan leh Pablo Bartholomew te an ni.

Kalkhawmte chuan DNA sample lak leh zirchianna hi uluk taka kalpui an duh thute, rinthu leh rindan awmsa hmanga ngaihdan siam ringawt lo tura an duh thu te, uluk taka tih anih loh chuan Mizo hnam tan a pawi theih dan leh Mizo hnam chanchin pawh thui tak a nghawng theih thute an sawi a. An thil hmuhchhuahte chu tlangzarh anih hmaa en ho leh phawt chu an duhthusam anih thute an sawi bawk.