Aizawl : July 16, 2020 a R. Dengthuama Hall transit Centre-a dahluh Myanmar lam mi, a test result chhuah hnua positive a ni tih an hmuhchhuah chuan an awmna security gate paltlanga dawra thil an lei avangin Salem Veng Local Task Force chuan nimin chhun dar 12:00 atanga khan an veng chhungah curfew an puang a, gate duty Police lakah Salem Veng an lungawi lo hle.

Salem Veng Local Task Force Secretary K. Lalrinmawia hnen atanga thu dawn danin an veng Task Force te hian tun thlengin duty an la kalpui reng tih a sawi a, hetihlaia transit centre-a awmlai a chhuak thei chu an hre thiam lo hle.

“Police-te hian gate pahnih chiah ven tur an nei a, hei hi chu veng hneh ve rawh se. Zana rawn lut hi an la awm reng a, hei vang hian keini lam pawh kan duty ngawrh hle a, a police duty-te ber hi zanah hian an mu tlat zel hi kan hre thiam lo. Quarantine Centre lama official duty-te hi chu an tlaivar ziah zawk. A hma pawhin duty-te hi thinrimin kan kal chilh fo tawh a, hetiang dinhmun kan thlen takah phei chuan kan lung a awi lo tak zet a ni. Duty-te hi ven an ngai ber zawk a ni,” tiin K. Lalrinmawia hian ZALEN a hrilh.

“Tun dinhmunah phei chuan rawn haw an awm apiang hian positive hi an awm ziah ang a ni ber tawh a; chuvangin, fimkhur a ngai hle a, keini lam pawh kan inthlahdah ngam lo. Tuna Myanmar lam mite phei hi chu Mizo tawng chu sawi loh, saptawng pawh thiam lo an ni a, hriathran an awlsam a, inchhui dawn mai dan pawh a awl zawk a ni,” a ti zui bawk.

Delhi atanga rawn haw Myanmar lam mite hi 13 an ni a, R. Dengthuama Hall-a dah luh an nih hma hian foreigner an nih angin Lengpui-ah ni 4 vel chu khunghran an ni tawh a, Zirtawpni khan Champhai-ah thawn chhoh nghal an ni a, a result hi Zirtawpni zana chhuak zinga mi kha a ni a, chhuaka ber hi a lo positive bawk si avangin nimin khan veng chhungah contact tracing an ti a, rinhlelh mi 15 result chu nimin khan ZMC lamah thawn nghal niin ZALEN chuan thu a dawng.

Curfew hi eng chen nge an kalpui dawn tih an chiang lo a, sample test result chhuah an nghak phawt ang a, an dinhmun a zirin pawh sei pawh a ngai mai thei niin hriat a ni bawk. Positive chhuakin a dawr te chhung bakah rinhlelh te hi Home quarantine nghal an ni. Zirtawpni zan khan Salem Veng TKP chuan hnatlang an nei a, hetah hian he dawr neitute zinga mi hi a hnatlang ve niin hriat a ni a, hei vang hian veng chhung curfew pawh hi kalpui a nih phah.

Salem Veng Local task Force chuan vengpawn lam ten he curfew hi lo support turin an ngen a. National Highway-a an veng tlan tlang turte tan erawh vengchhunga ding khawmuang lovin a tlan tlang theih tih an sawi.