ZALEN April 27, 2025 : March 13, 2025 zana Zokhawthara heroin hawng 440 man chungchang chu police-ten an la chhui zo lo va. Hetihlai hian hawng 440 man hian ruihhlo do kawngah harh tharna a thlen mek nia thudawn a ni.

Champhai district police-te hnen atanga ZALEN thudawn danin heroin hawng 440 (kg. 4.722) man chungchang hi police-ten ngawrh takin an la chhui zui mek a, tun dinhmunah chhui zawh a la ni lo a, chargesheet an la peih fel lo va. An peih hunah an chhuina report (chargesheet) chu court-ah thehluh a ni ang.

Thudawn danin, heroin hawng 440 kaihhnawihah hian a tira an mi mante bak mi dang man belh an awm lo a, an mi mante chu Champhai District Jail-ah dah an la ni.

Media hrang hranga tar lan tawh angin, heroin hawng 440 kaihhnawihah hian Chhuansawmlala (18), Khuangphah, Zomuansanga (18), Champhai Bethel veng, Zokhawthar mi pali Vanlalhriata (21), Zothansanga (20), Lallianmawia (19), Lalmalsawma (21) te lakah thubuai ziah luh a ni a, kumtlinglo pakhat erawh Juvenile Justice Board, Champhai hnenah hlan a ni.

He thubuai kal zelah inhnamhnawih dang, Henry Lalbiakzinga (34), Dinthar, Aizawl leh Laltluangzela (28), Zokhawthar te pawh March 15 khan man belh leh an ni.

Heroin vanga mante hi ‘The Narcotic Drugs & Psychotropic Substances Act, 1985’ tlawhchhanin thubuai siamsak theih an ni a. Thubuaiah thiam loh chantir an nih chuan kum 10 atanga kum 20 thleng jail tan leh pawisa Rs. 1,00,000 atanga Rs. 2,00,000 thleng chawi bawk tura hrem theih an ni.

Hetihlai hian Aizawl khawpui chhung leh khawpui pawn YMA branch thenkhat atanga ZALEN thudawnnate chuan tun hnaia heroin hawng 440 zet man a nih avang hian ruihhlo/zu do beihpui thlaknaah harh tharna a thleng chho mek nia an hriat thu an sawi.

“Zu leh ruihhlo do tura thawk chhuak tur pawh kan inhmuh tawh mang loh hnuah tunah chuan a tulzia hriain kan member-te thatho takin an rawn thawk chhuak thar leh mek, ruihhlo do turin nasa zawk a ke pen zel pawh kan tum,” tiin ZALEN thudawnna YMA branch thenkhat hruaitute chuan sawi.