Aizawl; September, 2022-a Aizawl veng pakhata hmeichhe naupang kumtlinglo pawngsual ni ngeia hriat boral ta nu leh pate lie detector hmanga thu zawhfiahna report zirchianna chu Mizoram police-ten an ngaihchang mek.

ZALEN zawhna chhangin Aizawl SP C. Lalruaia chuan naupang thihna chungchangah hmalakna an kalpui mek zel tih sawiin, lie detector hmanga thu zawhfiahna report zirchianna pawh an la ngaichang mek zel tih a sawi.

Mizoram police-te chuan an thubuai chhuina pui turin a tum khatna atan December, 2022 tir lam khan lie detector an hmang a. Miin dawt a sawi leh sawi loh hriat theihna nia sawi, lie detector hmang hian September, 2022-a Aizawla naute pakhat, mipat hmeichhiatna thila khuaikhem ni ngeia hriat nu leh pate thu zawhfiah an ni.

Aizawl SP chuan, lie detector hi court phalnaa hmang tur an ni tih thuthar thehdarhtute a lo hrilh tawh.

Lie detector hmanga thu zawtfiah tur hian Delhi-a Forensic Science Laboratory atangin Aizawlah mi thiam pathum an kal a, naute nu leh pate thu an zawhfiah hnuah Delhi-ah an let leh a, hun eng emaw chen report ngaihchan a nih hnuin Mizoram police chuan report an dawng tawh a, chumi report chu mi thiamten an zirchiang mek nia thudawn a ni.

Media hrang hrang a tarlan tawh angin naute pawngsual ni ngeia hriat nu leh pate chu police-in manin tum eng emaw zat thu zawt tawh mah se finfiahna an la nei thei lo nia thudawn a ni a, lie detector report hi court-in thu tlingah a ngai lo a, police-te hnuchhui zelna atan tangkai taka hman thin a ni thung.