June 15, 2022; Mizoram police te chuan, tun June thla chanve chhungin Mizoram hmun hrang hrangah, ruihhlo 'international market' a Rs. 92,900,000 hu vel zet man an nei. Chung ruihhlo neitu a puh mi 11 an man te chu mipa 7 leh hmeichhia 5 an ni.

Mizoram police chhinchhiah danin, tun thla June 1-14 chhunga ruihhlo an man te hi heroin vek niin, Hnahthial PS team-ten June ni 3 a Leite, Hnahthial district a heroin an man, sahbawn bawm 40 a thuhruk, grams 502.46 a rit, international market-a cheng nuai 251 vel man hu chu tun thla chanve chhung a tum khat a ruihhlo an man tam ber niin, a neitu a puh mipa pakhat an man tel bawk.
    
Thla kal mek, June thla chanve chhungin Champhai district chhungah ruihhlo tum 5 man a ni a, Champhai district hmun hrang hrangah police te chuan random checking neiin ruihhlo do beihpui an thlak ngawrh hle a ni. Police ten ruihhlo an man te hi 'international market' in a hlutna chhut a ni a, 'local market' ah chuan a hlutna tlahniam deuh tura ngaih a ni.   

Ruihhlo bakah, dan lova lakluh foreign cigarettes, bawm/case 191, cheng nuai 25 man hu, motor pathuma phurh lai chu Saitual police patrolling party te chuan June ni 8 khan Saitual-Saichal junction-ah an man bawk a.  A phurtu (drivers) te chu COTP Act hnuaiah thubuai siamsak an ni.