September 7, 2023; Special Judge Prevention of Corruption chuan, Chhingchhip Villge Council-ten ni 100 inhlawhna pawisa an hman dan chhungchanga thil fello awma puhna, Anti-Corruption Bureau (ACB) ten a chhuina tih tawpna dilna (Closurereport) an thehluh chu a hnawl sak a, chhui nawn leh (Re-investigate) turin Lokayukta leh ACB-te a hriattir.

He case ah hian Chhipchhip Village Council hmasa ten MNREGS atanga mipui thawh khawm an dawn Rs. 7,06,400/- a nih lain Village Council thar hnenah Rs. 2,01,559/- chauh an hlan a, a bak an sum hmanna leh an hnathawh hi a inmil lo nasa hle a sawiin chhui fiah a nih theih nan Lalnunmawia, Village Council President thlan thar chuan FIR a thehlut a ni.

Chhingchhip V/C te sum hman dan hi Preliminary Enquiry ah thil dik lo awm ngei a lan avangin Special Court chuan Anticipatory Bail an dilna pawh a lo hnawl sak tawh a ni. 

Case IO chuan he thubuai hi ngun takin a chhui a, mahse thubuai an siam sakna chhan tling hmu lova ngaiin Court-ah case tih tawp dilna (Closure Report) a theh lut a, mahse court chuan thil dik lo awm ngeia a lan si avangin chhui nawn leh tha a tih avangin hetiang hian order a siam ta a ni.

Hetih lai hian N. Vanlaiphai Village Council ten College Fund a tana mipui sum thawhkhawm (MNREGS) an dah hman dik lo nia sawi chungchang chhuina thubuai (ACB PS Case No. 5/2022 dt. 05-07-2022 U/s 11/13(2) PC Act) atanga Closure report, Case IO thehluh chu a pawm sak thung.