Aizawl: Nimin khan Police venhimna hnuaiah Mizo Tank Lorry Driver te chu Assam a oil phur turin an kal a, he chanchin buatsaih lai thleng hi chuan harsatna an tawh hriat a ni lo.

Zalen in Police hotute hnen atanga thu a dawn danin Ramnagar a oil phur tur hian tanker 24 an kal a, heng lirthei te hi Police te chuan veng (escort) in an hruai a. Boruak pawh a muanawmin a hlauh-awm lemlo niin an sawi.

Thudawn danin Mizoram Oil Tanker Driver's Association leh Mizoram Tanker Owners Association te chuan load lak chhunzawm nise an ti chungin Mizo driver ten escort tello chuan Ramnagar-a load la tura kal an ngam loh avangin Zirtawp zan khan Home Department leh Supply department ten meeting an neih hnuah escort hi pek nise an ti a, nimin zing atangin Ramnagar-a load la turin an chhuak nia thu dawn a ni.

Lailapur-a Cachar Driver Association ten Mizoram Oil phur lirthei 12 driver leh handyman 10 vel kut an lo thlak chung-changah Dholai Police Station-ah, Mizoram Tankers Association te chuan Mizoram Police kaihruaina hnuaiah FIR an thehlut a, Assam Police chuan Cachar Driver Association te hi an la ko kal hlei thei lo niin thudawn a ni a, hetianga FIR te thehluh anih avang hian boruak tha lo awm thei a la nih bawk avangin Mizo tank lorry driver te hian escort an phut a ni.

Hun engemaw chen Oil phur te an rawn luh mumal loh avangin Mizoramah Oil dinhmun a tha vak lo a, Aizawl ah chuan lockdown vangin a ziaawm a, Aizawl pawn hmun thenkhat filling station a stock nei mang lo an awm nual hman a ni.