Aizawl August 3, 2022 : ZPM Research Wing buatsaih ‘Workshop on Vegetable Market’ Chaltlang Tourist Lodge-a neih a hmanpuinaah ZPM Leader Lalduhoma chuan, an hun hman chu politics a luhchilh hnua a hlim ber ni te zinga mi a nih thu a sawi.

Kalkhawmte hmaa a lawm zia sawiin Laldunoma chuan, “Thiamna bik nei mi thiam 60 rual zet mai kan rama kuthnathawktute din chhuahna veitu in lo kal khawm hi thil la awm ngai lo a ni a, ka hnuk te pawh in ti ulh a ni. Mithiam rual, midang te tana luanchhuah duhna rilru pu mi heti zat in lo pungkhawm ka hmuh hian politics-a ka zuan luh hnuah ka hlim ber ni te zinga pakhat a tlingin ka hria a,” a ti. 

August ni 2, 2022-a hun an hmannah hian ZPM Leader chuan, “Kan thil tuh tur chu Environment friendly a ni tur a ni a, kan bultanna tur chu eng thil pawh mipui-ah zuar dawn ila, research base a ni tur a ni. A kal kawng (road map) kan siam chin lo chu mipui hmaah kan dinpui tur a ni lo. Kan ramah research base a kan kal loh avangin kum 35 chhung hian kuthnathawktute thingtlang lo neih bansan tura duhthlan tur kan pek hi a tam lutuk tawh, thlai kan chin thlawntir eng zat nge awm tawh. An kut a durh thlawn a, an thlan a far thlawn a, an kawng a kham thlawn hnem lutuk tawh. Thlai inchintir ringawt a, a market ngaihsak zui loh a tam, hetiang hi kan duh tawh lova, zirchianna research base in ZPM chuan hma kan la a ni,”a ti. 

Dunoma chuan, "Thil eng pawh ti dawn ila, vision neih a ngai a, dream a ni tur a ni lova, kan vision chu a ngelnghetin a tluantling (sustainable) tur a ni thung a. Tluantling tur chuan a pawimawh hmasa chu a eizawngtu tan eizawnna tlak a nih a ngai phawt a ni. Pahnihnaah chuan midang tan leh vantlang (society) tan thil tha lo thlen tur thil a ni tur a ni lo, zu zawrh kha sum hmuh nan a tha viau mai thei, mahse vantlang tan a tha lo," a ti bawk. 

Kuthnathawktute tan thil rin mai ngam a harsat tawh thu sawiin, “A taka vegetable supply chain titu te, a bikin loneitute’n rin ngam  harsa an tih thu an sawi hian ka rilru a luah hle. Kum 35 chhung party pahnih ten thlai thar an lo chin tir tawh, an lo bum tawh te rinna hlawh hi thil harsa tak a ni a, amaherawhchu, a tak taka hnathawktute’n a taka kan kalpui hunah chuan Mizo mipuite-a rinawmna la inphumru tlat  hi hai chhuahin a la awm ang a, rinawm takin sumdawnna kawngah pawh Mizote hi kan la kal theih a beiseiawm a ni,” a ti. “Beidawng mai lo ila, mipuite rin ngam tura kan awm phawt chuan mipuite hian min la rin ngam ngei ngei ang tih hi i beisei tlat ang u,” a ti bawk.