Aizawl: Mizoram sawrkar chuan Covid-19 enkawlna hmanrua mamawh tawk neiah a in ngai a. Zoram Medical College a Covid testing centre chu tunkar chhung hian hna thawh tan theih an in beisei.

Zalen in Health & Family Welfare Board Vice chairman Dr. ZR Thiamsanga hnen atanga thu a dawn danin tun dinhmunah Mizoram chuan Personal Protective Equipment (PPE) 15,000 vel a nei hman a, tunah hian sang riat vel a kawl mek a, 800 thui tir mek a ni bawk a, a tam thawkhat nia hriain, "PPE bikah chuan thlamuan thlak hrihah kan ngai," a ti.

Dr. ZR Thiamsanga chuan Mizoram in ventilator 110 a nei mek tih sawiin, "Tunah hian 19 dang chah belh mek a ni a, hei hi a lo thlen hunah chuan Civil hospital-ah dah kan tum a. Tunah hian civil hospital, Aizawl-ah hian ventilator 5 awm mekin tihlen kan tum a, Zoram Medical College, Falkawn-ah 16 an awm mek bawk a ni," a ti.

ZMC a Covid-19 enna khawl chu ni 3 vel enchhin (trial test) a ngai phawt dawn tih sawiin ICMR ten an pawm chuan test nghal theih a ni dawn tih Zalen palai a hrilh a. Tunah chuan covid-19 sample chu Silchar Medical College-ah an la thawn hrih niin a sawi a. Zirtawp tlai thleng khan Covid-19 sample hi 58 lak a ni tawhin mi 48 te result hriat a ni tawh a, an zinga 1 chuan Covid-19 hi a vei tih finfiah a niin mi 10 te result nghah mek a ni. Tuna Covd-19 vei Falkawn damdawiina enkawl mek chuan hma a sawn niin damdawi in thawktu ten an sawi.

Covid-19 enkawlna hmanrua PPE chungchangah thil awmdan an thlir mek zel tih sawiin Dr. Thiamsanga chuan mi tlawmngai hrang hrang Vakiria, Womens Polytechnic leh mimal engemaw zatin an thui avangin harsatna a awm lo turah an beisei tih a sawi a. Covid-19 chu Mizoram-ah a len palh thulhah tuna thawktute pui turin Doctor leh damdawi lam thawktute address zawng zawng an lakhawm vek tawh niin a sawi bawk.