ZALEN September 5, 2023 : Congress chuan Narendra Modi sawrkar hnuaiah India 'Union of States' a nihna chu derthawngin a awm mek zel an ti a, G20 Dinner sawmna 'President of India' in a tihchhuahah "President of Bharat" tiin sawmna a tichhuak a, BJP ten 'One Nation, One Election' min barhluih an tum mek bawk an ti.

MPCC thuchhuak chuan, Rashtrapati Bhawan-in September 9, 2023-a G20 Dinner neih tura sawmna a siamah 'President of India' tih aia 'President of Bharat' a tih hian Constitution a Article 1 a "Bharat, India chu Union of States" a ni ang a tih a 'Union of States' hi derthawng-ah a siam a ni, an ti.

Congress chuan, "India tih aia Official-a 'Bharat' a hmang lui hi India rama Hindu len tir tumna kalzel a ni. 'President of Bharat' tia sawmna semchhuah a nih hma lawk ni hnihah Hindu kulhmuk Rashtriya Swayamsevak Sangh (RSS) te chuan India tih hmang tawh lovin Bharat tih hman tawh tur an ti bawk a ni," an ti.

"BJP te hian INDIA hi an hnawl ngawt theih a ni lova, India mipui vaibelchhe 135 te hi Political Party pakhat ta a ni lova, National Identity hi BJP personal property a ni hek lo. Centre-a BJP kaihhruai NDA te hi a bik takin Northeast State-te tana hlauhawm zual an ni a, sum leh pai leh thuneihna hmang sualin thuneihna an chan theih nan mipui thlan sawrkar pawh zah zo lova, a remchan dan ang anga paihthlak tum reng an ni," an ti bawk.

Congress chuan Hmarchhak mite tana him lo BJP te chuan an buaipui chho mek nia sawiin, " 'One Nation, One Election' min barhluih an tum mek a, 'One Nation, One Law' (Uniform Civil Code) an buaipui mek bawk a. Tun ang renga thil a kal chuan 'One Nation, One Religion' pawh an la ti duh mai ang. New Education policy hmangin 'three language formula' kalpui an tum mek bawk a, 'One Nation, One Language' pawh an thiltum bul ber pakhat a ni bawk," an ti.