Aizawl June 13, 2023: Vawiin khan I&PR Auditorium-ah ‘Press Accreditation Card’ semchhuahna hun hman a ni a, Information & Public Relations Minister Lalruatkima chu khuallian niin Mizoram Journalists' Association Gen. Hqrs. Office Bearer leh Executive Member-te hnenah ‘Press Accreditation Card’ thar a semchhuak a; Aizawl District huamchhunga Accredited Journalist-te Accreditation Card thar chu MJA President kutah a hlan nghal bawk.

I&PR Minister Lalruatkima chuan sawrkarin chanchinbu mite a dah pawimawh hle tih a sawi a. Accredited Journalist ni tura State Press Accreditation Committee-in uluk taka a thlanchhuah ten Accreditation Card an dawng thei chu a lawmpui thu sawiin, tangkai taka hmang turin duhsakna a hlan. Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziak te uluk lehzuala endik thin turin a fuih bawk. 

I&PR Minister chuan Journalist-te tan sawrkarin theihtawp a chhuah thin a ni tih sawiin, Journalist Pension Scheme pawh tihpuitlin thuai a nih tur thu a tarlang a. Tun dinhmunah Journalist Welfare Fund atan cheng nuai 20 dah a ni a, tun sawrkar term chhungin Press Tour vawi 5 neih tawh niin Parliament-a training nei turin chanchinbumite chu batch hnih tirh a nih tawh thu a sawi bawk. Press Accreditation Card hian tangkaina tam tak Mizoram chhung leh pawnah a nei tih sawiin, chutih ruala mawhphurna a ken telte chu hre reng turin chanchinbumite a chah nghal a ni.

Lalruatkima chuan Information Technology-in khawvel a run mek a ni tiin technology chhuak tharte um pha tur chuan mahni insiamrem a ngaih chang a awm fo a, hmanraw thar hmang thiam zel turin chanchinbumite pawh mahni intuaihriam thiam turin a chah a. Social Media hmansualna a tam hle nia a hriat thu sawiin Minister chuan a bik takin tawngkam mawilo leh thuziak dik tawklo a hluar hle a, Accredited Journalist-te chu hemi kawnga fimkhur tura ngenin ‘Journalist Ethics’ vawng nung reng turin a sawm. 

MJA Gen. Hqrs. President C. Lalrambuatsaiha pawhin thu sawiin Press Accreditation Card semchhuah a nih theihna tura Minister leh I&PR Department-te hmalaknaah lawmthu a sawi a, Minister hnen atang ngeia Accreditation Card an dawng thei chu thil chhinchhiah tlak leh hlu tak a ni a ti.

Press Accreditation Card hi kum hnih chhung nung tur a ni a. Mizoram district hrang hranga atanga Mizoram Sawrkar hnuaia Accreditation dilte atangin State Press Accreditation Committee chuanthlangchhuakin, Journalist 140 hnenah pek a ni a. Aizawl District bikah chuan Journalist 51 hnenah pek a ni.