Aizawl: Ram pum huapa faina leh thianghlimna beihpui thlaka hmalakna kal mekah Mizoram Journalists' Association General Headquarters pawhin he hmalakna hi a thlawpin a tawiawm ve a ni tih lantirin nimin khan an office - Aizawl Press Club building leh a chhehvel tifaiin member-te an hnatlang.

Hnatlanga an thawhchhuah hma in inkhawm tawi an neih chu MJA vice president Lalremsiama'n a kaihruai a. MJA president Zonunsanga Khiangte chuan Mizoram sawrkarin faina atana ruahmanna a siam dan chu fakawm a tih thu a sawi a. Kum danga la hriat ngai chiah loh, waste to art exhibition leh khawlaia bawlhhlawh paih leh chil chhakte dan awmsa tlawhchhana a hmuna mana pawisa chawitir ni -  No Tolerance Day hman a ni te chu tha a tih thu sawiin, "Dan thar tha tak kan nei tawh bawk nen, chin zel tlak niin ka hria. Dan hi khauh taka lekkawh hian a tha in a hlawhtling mai a, faina lamah pawh tun ai hian hma kan sawn ang a, khawpui a fai chuan thingtlang lamin a zui mai dawn a ni," a ti. Bawlhhlawh thliarhran lamah pawh sawrkarin hma a la zel pawh lawmawm a tih thu a sawi bawk.

Hemi hnu hian member thawkchhuak ten Aizawl Press Club chhung leh pawn bakah a chhehvel an tifai a, member thahnem tak an thawkchhuak a ni.