ZALEN June 22, 2025 : Sawrkar laipui scheme pakhat, kut themthiam leh thil siam thiamte tanpuina leh khaichhuah tura duan, ‘PM Vishwakarma Scheme’ hnuaia tanpuina dawng tura inziak lut Mizoram-ah 10,740 an awm tawh.

Mizoram sawrkara Commissioner H. Lalengmawia kaihhruaina hnuaiah Zirtawpni khan PM Vishwakarma Scheme kalpui dan thlirletna neih a ni a, he huna an tar lan danin he scheme hi Mizorama kalpui a nih hnuah tanpuina dawng tura in ziak lut hi mi 10,740 an awm tawh a, stage 3 thleng paltlanga Screening Committee-in a pawm chu 3,297 a ni.

Thutkhawmah hian tanpuina dil tura inziaklutte loan lak atanga a pung rulh tur zat ngaihdam (interest subvention) leh bank nena inthlunzawnna tha siamsakte leh tha zawk leh chak zawka district tinah skilling leh training kalpui dan turte rel a ni.

PM Vishwakarma hi September 17, 2023 khan kalpui tan a ni a, a thil tumte chu kutthemthiamte thiamna hriatpuia, he scheme hnuaia hamthatna awmte hmang thei tura tanpui te, tunlai khawvel mila an thiamna belhchhah te, an theihna leh thil siam quality belhchhah tura tanpui leh hnathawhna hmanraw changkang zawk ngaihtuahsak te, dahkham awm lo leh a punna hniam zawka loan awlsam taka an lak theihna tura tanpui leh an thil siam chhuahte hralh chhuahna kawnga tanpui te a ni.