Aizawl: Health Minister Dr. R.Lalthangliana chuan Private Hospital leh Private laboratory-ah te TrueNAT khawl hmanga sample test leh Rapid Antigen Test kalpui theih a ni dawn ta niin an sawi.

Nimin thuchah a tih-chhuah ah Health Minister Dr. R.Lalthangliana chuan thla hmasa atang tawh khan Private Hospital leh Private laboratory-ah te TrueNAT khawl hmanga sample test leh Rapid Antigen Test kalpui a nih theihnan hma a la tawh tih sawiin, "The Mizoram (Containment and Prevention of Covid-19) Ordinance, 2020 hi amend a ngaih avangin dan anga thil tih ngai a awm a, COVID-19 in sawrkar pisa hrang hrang a luhchilh avangin duh anga chaka hma lak a har deuh a, Law & Judicial department in an vet hnu ah Council of Ministers in an pawm a ngai a, Chief Minister in thutkhawm kher loh a tihfel ngai turin ruahmanna min han siam sak hlauh mai a, Zirtawp tlai khan sawrkar gazette-ah tihchhuah a ni ta a. He dan hmang hian Private Hospital leh Private laboratory-ah te TrueNAT khawl hmanga sample test leh Rapid Antigen Test kalpui theih a ni dawn ta a ni," a ti.

Health Minister chuan Chief Minister hmalakna avangin Truelab Quattro micro PCR pawh an awmna tur district 10 ah tunah chuan an function vek tawh a, test pawh an kalpui tawh a ni tih sawiin heng khawlte hian natna chi hrang hrang 16 a test theih dawn niin a sawi a. Mizoram in Covid-19 hri kai endikna tur RT-PCR khawl a neih hmain state dangah sample 58 endik a ni tih sawiin, "April ni 7 atang khan mahni ram chhung ngeiah kan test ve tan thei ta a. Midang ta hawh ngawta innghat lova RT-PCR khawl neih dan ngaihtuahin theihtawp chhuahin hma kan la a. Midang ta hawh ngai tawh lovin July thla atang khan RT-PCR khawl 3 hmangin test hi kan kalpui tan a, tun thlenga RT-PCR leh test na atana senso tawh zawng zawng chu Rs. 1,81,72,108/- a ni," a ti. Dr. Thangtea chuan Covid-19 natna hriatchhuah a nih zung zung theih nan TrueNAT khawl hman a phal veleh hma an la nghal tih sawiin, "Central sawrkar TB Division atanga TrueNAT khawl kan dawn hmangin June ni 12, 2020 atang khan Lunglei Civil hospital-ah Covid-19 test tan a ni a. Chief Minister chuan District tinah TrueNAT khawl a dah a nih theih nan Chief Minister’s Relief Fund (CMRF) atangin khawlthar TrueNAT Quattro 10 lei min phalsak a.”

“Heng atana senso zawng zawng hi Rs. 3,82,34, 830/- a ni a. Rapid Antigen Test pawh August ni 6, 2020 atangin kalpui a ni a, ICMR atanga a thlawna 17,500 kan dawn bak 40,000 hi National Health Mission, CM relief Fund leh State sawrkar sum atanga lei niin Rs. 1,83,68,000/- sen a ni a. Rapid Antigen Test kit hi a ral chak em avangin tunah hian kan lei belh leh tawh a, test kit 20,000 chu Delhi Mizoram House-ah awm tawhin Thawhtanni hian Mizoramah rawn phurh thlen hman kan inbeisei a, Test kit 30,000 dang pawh lei turin kan book fel tawh a ni,” a ti bawk.

Aizawl khawpui bikah sample test ngai a tam tih sawiin health Minister chuan sample test result nghaktu ten dawhthei taka an lo ngaihchan thin avangin lawmthu a sawi a, "Sample test tur hi a sang bi tak meuh meuhin ZMC laboratory-ah a innghakkhawm tawh a, COVID-19 do kawnga mi tangkai tak takte sample emergency-a test sak ngei ngei ngai an awm thin a, anni tih loh chu sample lak ni indawtin test thin a ni," a ti a. COVID-19 veite enkawlna hmun atanga inchhuahtir dan tur "Discharge Protocol" pawh siamthat niin reilote ah hman tan theih a nih beisei tih a sawi bawk a. "Kan dinhmun hriaa kohhran leh YMA-te rawn penchhuaka an hmunhmate CCC atana hman phal an rawn awm belh zel hi lawmawm ka ti tak zet a, sawrkarin CCC atana a ruahman lawksate kan hman mekte a khah hnu a indaihlohna a thleng a nih pawhin kohhran leh YMA zarah kan thla a muang lawk hle a. "Community COVID Care Centre" ti a kan han vuah heng hmunhmate COVID-19 positive te enkawlna atana ruahman dan turte, inenkawl dan tur leh inkaihhruai dan tur felfai takin kan rawn duang dawn a, tunah hian kan mithiamten uluk takin an buaipui mek a ni," a ti bawk.

Health Minister chuan Covid do kawnga tha thawhtu zawng zawng chungah lawmthu a sawi a. Thu thar a awm a nih loh chuan Aizawl khawpui pawh zanin zanlai pelh atangin kalphung pangngaiin a kal leh tawh dawn tih sawiin tul tawpkhawk ah lo chuan mipuite chu pawn chhuak lo turin a ngen a. COVID-19 vanga nunna chan an awm loh nan theihtawp an chhuah zel dawn tih sawiin, he natna hian min kian san thuai theih nan leh he natna avanga harsatna tawk zawng zawngte an dam theih nan tawngtai chhunzawm zel turin mipuite a sawm bawk.