Aizawl : Mizorama Private Hospital thenkhatte sawrkar bithliah anga an kal thei loh avangin inremna an la nei thei lo a, mipuiin nasa takin an tuar mek a, natna khirh tak tak tuar takten loh theih loh avangin Health Care scheme an hman theih lohna damdawi in an pan lo thei lo.

Zalen-in Private Hospital a biak kual hoah an health care bill hi nuai 300 chuang batsak an ni tawh niin thu dawn a ni a, pawisa ba hmuh let hi an inbeisei tawh loa, a kaw tawpah an tang tawh hlawm nia sawiin tawlh an tum loh thu an sawi bawk a. Sawrkar hospital ICU a khah avangin private hospital ICU ah refer leh tho niin thudawn a ni.

An phut ber chu
“Private damdawi inte hi tuna sawrkarin rate thar a siam ang hi chuan kal ngaihna a awm lo niin kan ngai a. Sawrkar hian kan rate hi pawm mai se, patient (damlo) kan enkawlna rate hi sawrkar rate-in a tlin lo anih chuan a tlin lohna hi damlo lam hian chawi mai se kan duh a, phai damdawi in leh Mizoram sawrkar inrem dan ang hi a ni mai, kan tana a theihloh bikna chhan hi hriatthiam a har ang reng,” tiin private hospital enkawltute chuan Zalen an hrilh a.

Mizoram sawrkar chuan December 3, 2019 khan thuchhuahin phai lam damdawiin damlote bat theih lohnaah chuan an (sawrkar) rate anga re-imburse theih tur thu an tarlang a. Hemi awmzia chu inenkawlna bill chu sawrkar rate aia a tam anih chuan damloin sawrkara a re-imburse hunah tihhniamsak a ni a, a tihhniamna chu damlo chawi tihna a ni.

Mipuiin an tuar tan
“Mizoram private damdawi inte hian bungraw neih thatah pawh theihtawp kan chhuah avangin phaia ‘refer’ tur tam takah sawrkar kan chhan niin kan inngaia, sawrkar sum luangral tur tam tak kan vensak ve a, hlauh tur kan nih loa a chhawktu-ah kan inngai,” tiin Zalen an hrilh. “Tunah pawh sawrkar hospital-a ICU a khat reng a, chang lo an awmin empanelment an pek duh lohna private hospital ICU an kawhmuh leh tho si a, damlo leh an chhungte tan bill let ngaihna awm loa, a tuartu chu mipui an ni a, an pe thei lo a nih pawhin kan hnar thiang bik loa, kan tuar leh thin bawk a ni,” tiin an sawi bawk.

Nuai 300 + batsak
Empanelment-a tel duh lo damdawi inte hian tuna rate mai piah lamah hian hlauhthawn an la nei a, Health Care scheme hmasa lam ICICI Lombard, Reliance leh tuna sawrkarin a thurualpui mek National Insurance Company thleng hian sum hi cheng nuai 300 chuang batsak an ni tawh niin an in sawi a, a tih ngaih na tak pawh an hre lo bawk a, damdawi in pakhat phei chu Nuai 150 batsak an ni.

Tawlh thei tawh ngang lo
“A hmasaah pawh min barh lui tawh a, a rate kan duh lohah insurance company nen min inthlunzawmtir a, a duh lo chu empanelment hlihsakah min vau a, an thu kan zawm a. Tunah pawisa an ba teuh a, insurance company te kut an ti a, an kut an sil leh hlauh si, a tawp kan thleng tawh a kan tlin tawh lo a ni, kan tawlh thei lo,” tiin Zalen an hrilh. Hospital pakhat enkawltu chuan, “Tihngaihna a awm tawh lo, hmu kir leh turah pawh kan inngai tawh lo,” a ti.

“Synod Hospital phei hi chuan sawrkar rate ang hi hmang se, thla khatah cheng nuai 6 vel a hloh dawn a,” tiin hospital enkawltu pakhat chuan Zalen a hrilh a. Synod Hospital hi National Accreditation Board for Testing and Calibration Laboratories (NABL) Certificate hmu tawh a ni a, an rate pawh a sang lo thei lo niin thu lakna chuan a ti bawk.

Hrut rual chi em?
Private hospital te hi hmunhma, ruhrel leh bungrua an inneih that hleih avangin rate khata dah lovin empanelment mumal awm theih nan sawrkarin category thensak a tum niin thudawn a ni a. Category then hmang hian rate hi bituk tur niin sawrkar lam chuan an hrilh niin an sawi a. Mahse, sawrkar-in parameter (tehfung) atana hman an tum chu dik tawk loah an ngai a, huang khata inchhunfin tumna thovah an ngai. “Kan infrastructure a inang lo a, RCC leh ply-wood-a pindan room rate khata kal hi a fuh lo a. Tehfung a siam en hian damdawi in pangngaiin a neih tura ngaih BP enna an nei em? Trolley an nei em? tihte a ni hlawm a, heti a nih chuan category khatah kan chhuak tho dawnin kan hria,” tiin an sawi bawk.

Private blood bank
Blood Bank a thisen lakchhuah dan thar chu sawkar damdawi in ni lo enkawltute pawl, Non Government Hospital Association of Mizoram (NGHAM) lam chuan hriatthiam har an tih thu thuchhuah an siam a; mahse, sawrkar lam hian thuchhuah thar siam zui leh nghalin Blood Bank atanga thisen pekchhuah dan a siam chu a tidanglam zui ve leh thung. Tunkara NGHAM inhmukhawmte chuan private-a blood bank siam dan dap a tul nia an hriat thu an sawiho bakah waste management pawh private-a kalpui dan an rilruah a awm tawh niin thudawn a ni bawk.