Aizawl : Sawrkar damdawiin ni lova Covid-19 kai leh kai lo endikna kalpui a nih theihnana Non-Governmental Hospital Association of Mizoram (NGHAM) te hmalakna chu a tak a thleng hnai tawh niin a lang a, Zirtawpni khan sawrkar chuan engkim peihfel tawh tih an thuchhuakah an tarlang a, damdawiin te hian nghahhlelhawm an ti tawh hle niin, ZALEN chuan thu a dawng.

Sawrkar lam hian private hospital ten TrueNAT laboratory an neih ve theih dan tur leh Rapid Antigen Test an kalpui dan tur pawh sawrkarin chak takin a bawhzui zel a ni, a ti a. Dan tlawhchhana tih a ngaih vangin sawrkar kalphunga zawm tur leh tih turte a awm a, engkim peihfel tawh niin Council of Ministers pawhin a pawm tawh a, sawrkar gazette-ah tihchhuah a nih veleh hman tan nghal a ni ang, a ti. Hetihlai hian private hospital te chuan tun dinhmunah RAgT bak tih tumna an nei rih lo niin ZALEN an hrilh. "Hospital lian lo tak tak kan ni a, RT-PCR khawl bun hi chu ti theiah kan inngai lo a, TrueNAT khawl pawh hi tih tumna kan nei lo, RAgT ti thei tur hi chuan phalna min pe thuai se chu kan ti khawp mai," tiin NGHAM hruaitu zinga mi chuan a sawi.

ZALEN in a biak NGHAM hruaitu chuan RAgT hi an ti thei anih pawhin hlawkna neia kalpui an tum loh thu a sawi. "RAgT kit hi sawrkar atangin cheng 450 in kan hmuh theih ka ring a, PPE cheng 200 man vel in a hmuh theih bawk ang a, hemia kan senso bak hi chu lak belh kan tum lo," a ti a, sawrkar kal tlang veka ti tur an nih thu a sawi lang tel bawk.

Private hospital te hian hian an damlo te puala test neih thuai theih hi an duh thu an sawi. "Tun dinhmunah chuan kan damdawiin te hi khar thut thut thei dinhmunah kan ding reng a, chuvangin kan damlo te dinhmun hi kan hriat ve thuai zel a ngai tawh a ni," tiin ZALEN an hirlh bawk.

Phai ram tam zawkah mimal damdawiin te mai bakah laboratory tam takin Covid-19 test hi an kalpui tawh a, kan bul mai Cachar-ah pawh hetiang hi private hospital ten an kalpui vek tawh. Mahse, Mizoram sorkarin The Mizoram Epidemic Diseases (COVID-19) Regulations, 2020 a lo neih avangin hei hi kalpui mai theih a ni lo a, hei vang hian private hospital te hian phalna an nei thei rih lo reng a, Law Minister lamah pawh theihtawpin hma an lo la thin tawh bawk.