Bungkawnin semifinal an beiseina tinungin Zirtawpni tlaia Tata SK 712 Pro Volleyball League-ah 25-11, 24-26, 25-18, 25-12-in Durtlang an hneh.

R Dengthuama Indoor Stadium, Mualpuiah Bungkawnin set thum la tlang nghal thei tura hun tha an puitlin zo lo naa set hnihna an hloh hnuah awlsam takin an tlang.

D3 Business Player of the Match lawmman dawngtu, F Lalparmawii’n vawi riat tisual chungin point 19 a thawk chhuak a, PC Lalrinpuii’n point 12 hmuin point nga a hloh ve thung a, hnehna kawngah Bungkawn an hruai kir.

2022 final-a an hneh loh, Bethlehem Vengthlang lakah tlawm nawnin Bungkawnin league bul an tan fuh lo a. An khelh vawi hnihnaah Durtlang hmaah nuam ti takin an khel a, inrintawkna leh beiseina thar nen an khel zui thei dawn.

2019 final-ah Durtlangin Bungkawn an hneh a, hemi hnu hian harsatna tawkin nikumah champion lai ni chunga vawi thum an khelhah an tlawm vek.

Tun season-ah el thamin an inlan zo chuang lo va, Kanan lakah set la lova an tlawm hnuah hma an sawn hret.

Lalrinthangi’n point 11 hmuin tum sarih a paih a, set hnihnaah 24-23-a hniam zawk an nih hnuin Bungkawn an pawt thla a. Tournament kal meka an tawn san lai ber ni zuiin an inghahna Lalpekhlui’n vawi 14 vaw tla mah se point 21 a hloh a ni.

Team paruk inel zinga a sang paliin semifinal an lut dawn a, an tlawm zawn hnuah Durtlang hmabak a khirh zual a, Thawhlehni tlaiah Bethlehem Vengthlang an khelhpui ang.

Thawhtanni tlaiah Bungkawnin Luangmual laka tlawm, Power Department Sporting Club an hmachhawn ve thung dawn a; an chak a nih chuan semifinal lut thei dinhmun thaah an inhung zui thei a, chutih rualin nghet leh hriam zawka inlan an mamawh ngei dawn a ni.

RESULT:
June 9, 2023 (Zirtawpni):
Bungkawn bt Durtlang (hmeichhia) - 25-11, 26-24, 25-18, 25-12 (3-1)

D3 Business Player of the Match: F Lalparmawii (Bungkawn)

Stats:
BUNGKAWN:
F Lalparmawii: point hmuh - 19, point hloh - 8
PC Lalrinpuii: point hmuh - 12, point hloh - 5
RK Lalfakmawii: point hmuh - 4, point hloh - 0
Elizabeth Laldinthari: point hmuh - 4, point hloh - 3
R Zorempuii: point hmuh - 4, point hloh - 5
Lalhmingtani: point hmuh - 4, point hloh - 6

DURTLANG:
Lalrinthangi: point hmuh - 11, point hloh - 7
Melody Lalrintluangi: point hmuh - 4, point hloh - 3
Lalpekhlui: point hmuh - 14, point hloh - 21
Emily Lalramsangi: point hmuh - 5, point hloh - 8
Lallawmawmi: point hmuh - 2, point hloh - 7
Vansangpui: point hmuh - 1, point hloh - 5

FIXTURE:
JUNE 10 (INRINNI):
03:30 pm: Luangmual v Bethlehem Vengthlang (hmeichhia)
08:00 pm: Durtlang North v Hunthar (mipa)

JUNE 12 (THAWHTANNI):
03:30 pm: Power Department Sporting Club v Bungkawn (hmeichhia)
08:00 pm: TNT v Tuichangral (mipa)

JUNE 13 (THAWHLEHNI):
03:30 pm: Bethlehem Vengthlang v Durtlang (hmeichhia)
08:00 pm: Chhinga Veng Spikers v Durtlang North (mipa)