Durtlang North laka set hmasa ber an hloh hnuah Hunthar an insiam tha a, set thum la zawnin league kal meka vawi hnih khelh tawhah an chak zawn ta a. Champion lai erawh a zawnin an tlawm ve ta thung.

R Dengthuama Indoor Stadium, Mualpuia TATA SK 712 Pro Volleyball League 2023 khelh mekah 2017 leh 2018 champion Hunthar tan Laldensanga leh Lalnunfela’n fel fai takin an khel a, hun pawimawhah Gagandeep Singh a rin tlakin a tangkai hle bawk.

Tun season Pro Division inelna vawi hnih awm tawhah Hunthar an champion ve ve a; season kharna leh Mizoram inelna sang berah champion tura rin hlawh ber ni mekin, an hlawhtling a nih chuan trophy pathum nen kum kharin a vawi thum nan Pro Volleyball-ah an champion dawn bawk a ni.

TNT lakah set la lovin champion lai, Durtlang North an tlawm tawh a. A hma aia el thamin khel mah se an tlo tawk lo va, boruak sangah hriam leh zuala inlan thei turin puitling leh paukhauh zawka khelh theih an mamawh.

Durtlang North tan a khelh hmasak berah Anup D Costa chuan beisei a pha lo hle na a; tun dinhmuna team tha leh nghet ber, Hunthar lakah langsar takin a khel a, Johan Vanneihtluanga, Fabian Lallunghnema leh Vanlaltanpuia’n an khelh hmasak aiin mi malin hma an sawn bawk. Mahse, vawi hnih an khelh tawhah an tlawm zawn avangin khelh thum an la neihah semifinal lut thei turin an hmabak a hautak dawn.

Thawhlehni zanah chak ngei ngei mamawh chungin Durtlang North-in Chhinga Veng Spikers an khelhpui leh dawn a, Ningani zanah Huntharin kai thar Tuipuiral an hmachhawn ve thung ang.

Result: Hunthar bt Durtlang North (mipa) 28-30, 25-19, 25-23, 25-22 (3-1)

D3 Business Player of the Match: Laldensanga (Hunthar)

Stats:
HUNTHAR:
Laldensanga: point hmuh - 16, point hloh - 1
Lalnunfela: point hmuh - 11, point hloh - 1
Gagandeep Singh: point hmuh - 21, point hloh - 14
Lalramnunfela: point hmuh - 7, point hloh - 4
Zomuansanga: point hmuh - 5, point hloh - 4
Lalruatfela Sailo: point hmuh - 1, point hloh - 3

DURTLANG NORTH:
Anup D Costa: point hmuh - 33, point hloh - 19
Johan Vanneihsanga: point hmuh - 11, point hloh - 2
Fabian Lallunghnema: point hmuh - 10, point hloh - 5
Vanlaltanpuia: point hmuh - 9, point hloh - 4
R Vanlalmawia: point hmuh - 5, point hloh - 4

FIXTURE:
JUNE 12 (THAWHTANNI):
03:30 pm: Power Department Sporting Club v Bungkawn (hmeichhia)
08:00 pm: TNT v Tuichangral (mipa)

JUNE 13 (THAWHLEHNI):
03:30 pm: Bethlehem Vengthlang v Durtlang (hmeichhia)
08:00 pm: Chhinga Veng Spikers v Durtlang North (mipa)