Luangmualin chanchin thar neih belh zelin Pro Volleyball League-a an inlan vawi khatnaah final an lut a, Inrinni zanah 3-0-in Bungkawn an hneh a, Mizo player langsar an kawlte che tha lo mah se Nipa Barad an nei a, an chakpui.

Tata SK 712 Pro Volleyball League khelh mekah legue round-a chak vek, Luangmual hian R Dengthuama Indoor Stadium, Mualpuiah an la tawn ngai loh semifinal an khel a, a tir lamah point kuain an hniam a; mahse, Nipa-i’n fuih phurin mar takin hma lam an pan tluan a, 25-22, 25-16, 25-20-in an chak.

Gujarat tleirawl hian vawi 24 vaw tlain point 11 a hloh a, D3 Business Player of the Match lawmman dawngin mi malin a filawr a. Luangmual Mizo player langsarten tum dang an pha lo va, Lalmuanpuii’n point ruk a hmuh aia point khata tam a hloh.

Chuti chungin Luangmual tan tawn hriatah an tluk lo tih loh team leh mi mal inelna kawng hrang hrangah Bungkawn aiin an chungnung a, Pro Volleyball-a an tel vawi khatnaah champion tura rin an hlawh telh telh.

An khelh hmasak ber atanga vawi ruk an chak zawnna niin derthawng lovin an bitum apiang an hneh zel a, Ningani zanah an hneh tawh ve ve, Kanan leh Bethlehem Vengthlang chak zawk nen final-ah an intawng ang.

League-ah set la lovin Bungkawn an tlawm a, an hmabak khirh viau mah se inelna sangah inthununna tha nen tlangnel takin bul an tan a. Set la thei turin 19-10-in hma an hruai tawh a, a tir lama che fuh tawk lo, kum 18 mi, Nipa chuan tum nga hlap tla zawnin Hmingthazuali’n a vaw tla bawk a, Luangmualin an hnaih chak hle.

22-20-in Bungkawn an sang zui leh na, RK Lalfakmawii’n vawi hnih net a bel a, Luangmualin point li hmu zawna chak tlang thei dinhmuna an awm laiin Bungkawn innghahna pawimawh, F Lalparmawii’n court pawnah a vaw chhuak.

League-a an inkhelh tum khan mi malin F-i a che tha a, khel tha bera thlan a ni a. Tun tumah point 13 hlawh chhuak mah se a hloh zat nen a intluk chiah a, Bungkawnin danglamna siam thei leh rin ngama vaw tla thei min dang an kawl lo va, an tuar.

Set hnihnaah Luangmual an chungnung a, set thumnaah Bungkawnin bei letin 18-17, 19-18-a sang zawk an nih laiin anmahni tihsualah point an hloh zel a. Lalhmingtani’n a vuak kai loh hnuah 20-19-in Luangmualin an kalsan a, Bungkawnin point khat chiah hmu belhin an el zo tawh lo.

Season liam ta lamah Bungkawnin uiawm takin champion thei tura hun tha an bawhbelh zawn a, Pro Volleyball hnuhnung pahnih, 2019 leh 2022-ah league-a sang ber ni chungin final-ah an tlawm zawn a. Tun tumah palina ni chungin knockout round an lut hram a, a zawna vawi thum final khelh an tumna an puitlin thei ta lo a ni.

Stats:
LUANGMUAL:
Nipa Barad: point hmuh - 24, point hloh - 11
Hmingthazuali: point hmuh - 6, point hloh - 4
R Malsawmtluangi: point hmuh - 4, point hloh - 2
Zoliansangi: point hmuh - 3, point hloh - 2
Lalmuanpuii: point hmuh - 6, point hloh - 7

BUNGKAWN:
F Lalparmawii: point hmuh - 13, point hloh - 13
RK Lalfakmawii: point hmuh - 8, point hloh - 6
PC Lalrinpuii: point hmuh - 4, point hloh - 4
R Zorempuii: point hmuh - 2, point hloh - 2
Lalhmingtani: point hmuh - 2, point hloh - 3

SEMIFINAL FIXTURE:
JUNE 26 (THAWHTANNI):
08:00 pm: Kanan v Bethlehem Vengthlang (hmeichhia)

JUNE 27 (THAWHLEHNI):
08:00 pm: TNT v Tuichangral (mipa)

JUNE 28 (NILAINI):
08:00 pm: Chhinga Veng Spikers v Hunthar (mipa)